«Chacieŭ adpomścić za hvałt». Sudziać mahiloŭca, jaki raskidaŭ samarezy na parkoŭkach siłavikoŭ
Sud Leninskaha rajona Mahilova pačaŭ razhlad kryminalnaj spravy pa č. 1 art. 339 KK (Chulihanstva) u adnosinach da 50-hadovaha Siarhieja Bazuka. Jaho abvinavačvajuć u tym, što 26 kastryčnika i 11 listapada raskidaŭ na słužbovych stajankach kala abłasnoha ŭpraŭleńnia milicyi, KDK, 11-ha ŭpraŭleńnia HUBAZiK dy SK samarezy, kab supracoŭniki hetych viedamstvaŭ prabili koły słužbovych mašyn. Ad dziejańniaŭ mahiloŭca paciarpieŭ tolki supracoŭnik KDK, jaki acaniŭ škodu ŭ 30 rubloŭ, piša «Radyjo Svaboda».
Padobnaja sprava siońnia razhladajecca i ŭ Słucku, dzie miascovy žychar 4 žniŭnia raskidaŭ šruby kala budynka RAUS.
Spravu žychara Mahilova razhladaje sudździa Aksana Ratnikava. Abvinavačańnie kvalifikavała dziejańni Bazuka jak «hrubaje parušeńnie hramadskaha paradku, demanstratyŭnaje hrebavańnie ahulnapryniataj kulturaj pavodzinaŭ ludziej, skiravanych na paškodžańnie čužoj majomaści i dezarhanizacyju administracyjnych ustanovaŭ» — pa č. 1 art. 339 Kryminalnaha kodeksa. Ad dziejańniaŭ mahiloŭca paciarpieŭ supracoŭnik KDK. Jon prabiŭ koła mašyny na raskidanych Bazukam samarezach. Naniesienuju škodu ŭ 30 rubloŭ abvinavačany kampiensavaŭ.
Svaju vinu Siarhiej Bazuk pryznaŭ u poŭnym abjomie i raskajaŭsia. Na sudzie jon śćviardžaŭ, što svaim učynkam vykazvaŭ pratest suprać vynikaŭ prezidenckich vybaraŭ, źbivańnia siłavikami hramadzian na mirnych akcyjach pratestu, a taksama śledčych orhanaŭ, jakija nie pryciahvajuć vinavatych u hvałcie da kryminalnaj adkaznaści.
Bazuk u pakazańniach sudu adznačyŭ, što svaim učynkam vykazvaŭ pratest suprać dziejańniaŭ siłavych strukturaŭ. Namieraŭ destabilizavać ich pracu ci nanieści im škodu ŭ jaho nie było. Raniej jon piśmova źviartaŭsia z svaim bačańniem situacyi ŭ prakuraturu i Dziaržkantrol, ale adtul atrymaŭ «farmalnyja adpiski».
Ideja raskidać samarezy na stajankach jamu pryjšła spantanna paśla padziejaŭ 9 žniŭnia, bo «šmat naźbirałasia vypadkaŭ». Abvinavačany zhadaŭ, jak načalnik HUBAZiK raźbivaŭ vitrynu ŭ minskaj kaviarni, a siłaviki sa schavanymi tvarami «chapali ŭsich biez razboru» i «nieviadoma, kudy schoplenyja traplali». Sam jon sačyŭ za vybarčaj kampanijaj i byŭ nie zhodny ź jaje vynikami — «addadzienymi pracentami za prezidenta i kandydata ŭ prezidenty Śviatłanu Cichanoŭskuju». U Mahilovie ŭdzielničaŭ u mirnych akcyjach pratestu jak naziralnik.
Siarhieja Bazuka zatrymali na prypynku hramadskaha transpartu 16 listapada. Z taho času jaho ŭtrymlivajuć u śledčym izalatary Mahilova. Pavodle jaho, pakazańni śledstvu davaŭ dobraachvotna, biez prymusu. Samarezy jamu vydali na byłoj pracy ŭ zarobak. Ich raskidvaŭ na stajankach žmieńkami i viedaŭ, što placoŭki pad videanazirańniem.
Praciah sudovaha pracesu adbudziecca 20 studzienia.
