«Vy zrazumieli, čamu ja nie rvusia viešać na bałkonie transparant «Dziakuj miedykam». Horki list ź Minska
«Voś vam maja historyja, finału jakoj pakul nichto nie viedaje, — napisaŭ u «Našu Nivu» naš čytač ź Minska Piatro Žvirbla. — U mianie mocna chvareje svajak (ankałohija), i 4 krasavika, u subotu, mnie daviałosia padmianić brata na chatnim dohladzie taho svajaka.
Ranicaj 5-ha, u niadzielu, pračnulisia ad mocnaha kašlu treciaha nasielnika kvatery. Tempieratura 38, simptomy: virusnaja infiekcyja. Čałaviek pasprabavaŭ źbić tempieraturu, a ŭ paniadziełak 6-ha nakiravaŭsia ŭ palikliniku pa balničny. Balničny dali da 10-ha, renthien zrabili, pasłuchali. Pastavili dyjahnaz VRVI, vypisali antybijotyki dy inšaje… Testaŭ nie zrabili!!!
My hetaha chvoraha maksimalna izalavali ŭ našaj dvuchpakajoŭcy, ale 9-ha a 14-j hadzinie jamu stała tak kiepska, što daviałosia vyklikać chutkuju, jakaja zabrała jaho ŭ 2-ju balnicu, adkul čałaviek pryjšoŭ sam hadziny praz čatyry. Zrabili zdymak, analiz kryvi, a testu znoŭ nie zrabili i adpravili dachaty.
Pračnuŭšysia 10-ha, ja adčuŭ, što i ja zachvareŭ. Simptomy tyja samyja, tempieratura 37,2 tolki. Paźniej źnikli pachi i smak.
Moj brat taksama zachvareŭ 10-ha.
Chvoraha susieda chutkaja zabrała znoŭ — 15 krasavika a 14-j hadzinie. Ciapier užo z dyjahnazam dvuchbakovaja pnieŭmanija. Ciapier jon lažyć u toj ža 2-j lakarni pad kisłarodam i antybijotykami. Test u jaho nibyta admoŭny.
A ja, chvory, dalej dahladaju ankałahična chvoraha svajaka. Spadziajusia, vam zrazumieła, čamu ja nie adčuvaju žadańnia paviesić na bałkonie banier: «Dziakuj miedykam». Chto mnie choć niečym dapamoh u hetaj situacyi? Chto nam prapanavaŭ mahčymaści izalavać chvoraha svajaka, vypłaciŭ choć kapiejku dadatkovuju, kab palehčyć jaho dohlad? Dzie ŭ nas elemientarnaja mahčymaść prateściravacca, kab my mahli spakojna ŭ kramu chadzić, nie bajučysia nikoha zarazić?
Naadvarot, mnie stała zrazumieła, što dziaržava kinuła hramadzian na volu losu», — piša Piatro Žvirbla ź Minska.
