Jak na miescy byłoha aeraporta budujuć «Minsk-Śviet» ŠMAT FOTA
Žyły kompleks «Minsk-Śviet» budujuć na miescy byłoha aeraporta Minsk-1. Spačatku płanavałasia, što hetuju častku Kastryčnickaha rajona budzie zabudoŭvać rasijskaja hazavaja kampanija «Itera», ale ŭ inviestara skončylisia hrošy.
Paśla prajekt pieradali sierbam — bratam Karyčam i ich chołdynhu «Dana». U ich atrymałasia pabudavać «Majak Minska», niahledziačy na pratesty miascovych žycharoŭ, zabudavać kvartał kala parka Čaluskincaŭ, a ciapier ruki dajšli i da nastupnaha miehaprajekta.
Chto abjazdžaje kvartał z boku, i nie zdahadvajecca, nakolki chutka zabudoŭvajecca terytoryja. U inviestara chapaje hrošaj, tamu šmatpaviarchoviki rastuć adzin za adnym.
Pra zonu byłoha aeraporta nahadvajuć dva budynki: abodva ŭ svoj čas mieli status aeravakzała. Dvuchpaviarchovy budynak ź sinim dacham na vulicy Karatkieviča, 9a byŭ pieršym štabam aeraporta. Da niadaŭniaha času jon funkcyjanavaŭ jak paliklinika hramadzianskaj avijacyi. Ciapier jaje vyrašana źnieści dla novaj zabudovy. «Da 1 maja skazali začyścić placoŭku i pieradać jaje Minharvykankamu», — paviedamili «Našaj Nivie» budaŭniki.
Druhi ž aeravakzał, ź biełymi kałonami, byŭ pabudavany ŭ 1957 hodzie i nabyŭ status pomnika architektury, tamu znasić jaho nielha. Zaraz u hetym budynku znachodzicca štab «Dany».
Zabudoŭščyki «Minsk-Śviet» zapłanavali raźbić terytoryju na dzieviać kvartałaŭ: «Paŭnočnaja Amieryka», «Paŭnočnaja Jeŭropa», «Afryka», «Azija», «Paŭdniovaja Jeŭropa», «Suśvietnych tancaŭ», «Jeŭrazija», «Čempijonaŭ» i «Emirats luks».
Uźviadzieńnie «Emirats» amal skončana. U hetym kvartale ŭžo zdali damy «Dyjadema», piać «Maryn», dźvie 25-paviarchovyja «Palmy» i dźvie «Žamčužyny». Adna z «Žamčužyn», 8-siekcyjny dom «Chvala» i vialiki handlovy centr — jašče na stadyi budavańnia, tamu kłuby pyłu biaskonca ŭzdymajucca nad užo funkcyjanujučymi dziciačymi placoŭkami. Tak ci inakš, pył budzie stajać nad rajonam da 2027 hoda — mienavita taki termin vyznačany, kab zakončyć uźviadzieńnie «Minsk-Śvietu» całkam.
Na pieršych pavierchach damoŭ u «Emirats» užo pracuje para kaviarniaŭ, jość praduktovaja krama i navat miedycynskaja łabaratoryja. Pobač pabudavali i dziciačy sadok — pakul adziny na 8 kvartałaŭ.
Kaviarnia ŭ adnoj z «Žamčužyn».
Na placoŭcy kala sadka mamy ź dziećmi ŭpeŭnivajuć, što trapić u sadok było davoli lohka. Ale varta adyści ad placoŭki mietraŭ na 50 — i bolšaść baćkoŭ kaža, što vodzić svaich dziaciej u sadki ŭ druhich rajonach: u hety trapić nie atrymałasia. Škoły ŭ «Minsk-Śviecie» taksama jašče nie pabudavali. Jak zvyčajna i adbyvajecca ŭ novych biełaruskich kvartałach, infrastruktura značna adstaje.
«Moj syn jeździć u škołu ŭ Sucharava, dzie žyli raniej, tamu što tut jašče niama nivodnaj, — raskazvaje žycharka «Dyjademy». — Nam usio abiacajuć, ale pakul ničoha niama. Va ŭsim astatnim — žyć u kvartale nam vydatna, my ŭžo bolš za hod tut».
Na pieršy pohlad, słaboje miesca prajekta — jaho azielanieńnie. Kala padjezdaŭ žyłych damoŭ rassadzili pa dźvie-try tui, usia astatniaja častka kvartała — biaskoncy tratuar i budaŭničy piasok.
Adzinaje, što pakul budzie nahadvać zialonuju zonu, chacia b letam, — Kozyraŭskija mohiłki, na jakija vychodziać vokny ŭsich piaci «Maryn». «Naša Niva» spytała ŭ adnoj z žycharak, jak joj taki vyhlad z akna i ci kaštavała jaje kvatera mienš za kvatery z voknami «ŭ dvor»:
«Mianie vid na mohiłki nie biantežyć, my ŭsie śmiarotnyja, — raskazvaje žančyna. — Tym bolš letam heta budzie zusim nie prablema — šmat drevaŭ i praź zielaninu ničoha nie vidać. Mnie navat bolš padabajecca, čym vokny ŭ dvor: tam šumna, a tut tolki elektryčki, a nočču zusim pryhažość — cicha i spakojna.
Kozyraŭskija mohiłki.
Maja kvatera sapraŭdy kaštavała krychu mienš za astatnija. Viedaju, što ŭ majoj kvadratny mietr kaštavaŭ $900, a ŭ astatnich — kala 1200. Ale ž u mianie i kvatera maleńkaja — studyja, my jaje za $35 tysiač nabyli. A voś na apošnim paviersie doma, na 19-m, tam naohuł dźvie kvatery na adzin pavierch — tam budavalisia ludzi z hrašyma».
Damy «Maryny». Takich u kvartale «Emirats luks» piać.
Žycharka kaža, što ŭ novym rajonie joj, niahledziačy na aktyŭnuju budoŭlu praz dvor, žyviecca kamfortna: «Ja šmat dzie žyła, ale z hetym rajonam mnie vielmi paščaściła. Chutka tut mietro budzie, da centra — padać rukoj, dy i ludzi tut navokał zabiaśpiečanyja».
A voś žychar, jakoha my sustreli kala dziciačaha sadka, nie zhodny z tym, što rajon možna nazvać elitnym i sustreć tut šmat zabiaśpiečanych ludziej:
«My z žonkaj zrazumieli, što heta nie elitnaje žyllo: jakaja prapanova, taki i popyt. Chutka my źjazdžajem u Hrušaŭku — u nas dzieci, my pašyrajemsia. Dvuchpakajovuju kvateru tut my pradali za $90 tysiač. Žyli, u pryncypie, narmalna, adzinaje — tut uvieś čas budoŭla — pył, brud. Kramy jość, tak, sadok adziny na kvartał, ale pakul chapaje. Parkovak bolš chaciełasia b. Raniej zamiest sadka tut była parkoŭka, potym ziamlu pradali, a nam u žyroŭcy prosta viarnuli hrošy — niedzie pa 10 dalaraŭ».
U 14 hadzin pracoŭnaha dnia parkoŭki sapraŭdy amal zapoŭnieny. Žychary kvartała kažuć, što ŭviečary jany časta nie mohuć znajści miesca dla mašyny ŭ svaim dvary, tamu staviać ich u inšyja ci na darozie. Što budzie, kali pobač adkryjuć mietro i zasielać susiednija damy, žychary słaba ŭjaŭlajuć:
«Viedajecie, heta nie adnapaviarchovaja Amieryka, tut sapraŭdy budzie murašnik. U nas chočuć, kab było vyšej i ščylniej».
Na terytoryi kvartała, z boku mohiłak, funkcyjanuje 9-uzroŭnievy parkinh, košt jakoha 25 jeŭra na miesiac. Ale žychary kažuć, što lepš znojduć miesca ŭ inšym dvary, čym buduć tracić hrošy na parkoŭku.