Samalot raźviarnuŭsia nad Atłantykaj praz raźlituju kavu
Samalot z 337 pasažyrami na borcie zrabiŭ vymušanuju pasadku z-za taho, što piłot praliŭ kavu na prybornuju panel. Incydent zdaryŭsia ŭ lutym, ale viadoma pra jaho stała tolki ciapier — z dakłada brytanskaha Adździeła pa rasśledavańni avijacyjnych zdareńniaŭ, piša BBC.
Samalot Airbus A330-243 lacieŭ z Frankfurta ŭ mieksikanski Kankun, ale vymušany byŭ ździejśnić niezapłanavanuju pasadku ŭ Šenanie, Irłandyja.
Heta adbyłosia paśla taho, jak prybornaja panel pačała płavicca, i ŭ kabinie piłotaŭ źjaviŭsia dym. Lotčykam pryjšłosia vykarystać kisłarodnyja maski. U vyniku incydentu nichto nie paciarpieŭ.
Pavodle Adździeła pa rasśledavańni avijacyjnych zdareńniaŭ, kamandzir pavietranaha sudna naziraŭ za dziejańniami druhoha piłota, kali im padali kavu. Haračy napoj prynieśli ŭ kubkach biez nakryvak.
Kamandzir pastaviŭ kubak na adkidny stolik, ź jakoha jon i pierakuliŭsia. Bolšaja častka kavy trapiła na kaleni kamandzira, a častka praliłasia na prybornuju panel.
Abstalavańnie ŭ vyniku razahrełasia nastolki, što knopki pačali płavicca. Heta pryviało da častkovaha paškodžańnia prybornaj paneli i prablem z suviaźziu.
Tady było pryniata rašeńnie raźviarnucca i pryziamlicca ŭ Šenanie. Pasadka prajšła vydatna.