Zasnavalnika homielskich «Mocnych navin» Piatra Kuźniacova ŭžo paŭhoda nadhladajuć na miažy «až da trusoŭ»
Zasnavalnik papularnaha homielskaha sajta «Mocnyja naviny» Piatro Kuźniacoŭ paskardziŭsia, što apošnija paŭhoda jon, jaho rodnyja i znajomyja majuć stabilnyja prablemy z prachodžańniem miažy.
«Heta pačałosia jašče ŭ minułym sakaviku, napiaredadni Dnia Voli. Tady byŭ pahłybleny nadhlad, potym jašče raz. Ale praź niejki čas usio spyniłasia. Sioleta ŭ sakaviku, kali viartalisia kampanijaj z Varšavy, to znoŭ adbyŭsia pahłybleny nadhlad», — raskazvaje Piatro Kuźniacoŭ.
«Potym toje samaje paŭtaryłasia ŭ krasaviku, u mai, u žniŭni, i voś ciapier žonka viartałasia z Kijeva, jaje taksama nadhledzieli. Praz heta navat ciahnik spaźniŭsia ŭ Homiel na paŭhadziny. Heta tak zvany pahłybleny nadhlad, tamu praviarajuć absalutna ŭsio. Kali ty na mašynie, to mašynu zahaniajuć u śpiecyjalny boks. Kali z aŭto, to heta moža zajmać pa 2—3 hadziny, kali biez, to da paŭhadziny», — dzielicca spadar Kuźniacoŭ.
Jon kaža, što kali vioŭ palityčnuju dziejnaść, to nadhlady adbyvalisia, ale byli chutčej pieryjadyčnymi, čym sistematyčnymi. «U čym sens ciapier tak praviarać, kali ja ŭžo nie zajmajusia palitykaj. Ni pra jakija bazy pamiežniki nie kažuć. Apošni raz majoj žoncy skazali: «Nu, vy sami možacie zdahadacca».
Sajt «Mocnyja naviny» źjaŭlajecca samym papularnym rehijanalnym internet-resursam.
