Pres-sakratar Minabarony — žurnalistu: Čamu vy ŭ vojsku nie słužyli? Saromiejeciesia svajoj seksualnaj aryjentacyi? AŬDYJA
Načalnik upraŭleńnia infarmacyi hałoŭnaha ŭpraŭleńnia ideałahičnaj pracy Ministerstva abarony Uładzimir Makaraŭ.
Karespandent «Našaj Nivy» Arciom Harbacevič źviarnuŭsia ŭ pres-słužbu Ministerstva abarony pa kamientar nakont mahčymych vučeńniaŭ NATA na terytoryi Biełarusi. Što adbyłosia paśla, patłumačyć składana. Pryvodzim stenahramu razmovy i aŭdyjazapis biez kupiur.
***
— Słuchaju, Makaraŭ!
— Dobry dzień, Uładzimir Maćviejevič! Vas turbujuć z haziety «Naša Niva», Arciom Harbacevič. Tut takoje pytańnie. «Lenta.ru» ŭčora pisała (učora nie dazvaniŭsia), što Biełaruś prapanoŭvała pravieści ŭ siabie vučeńni z krainami NATA. Moža, vy prakamientujecie, ci byli ŭ nas sapraŭdy takija sproby, čym skončylisia.
— A chto pisaŭ?
— «Lenta.ru». Ja mahu vam zaraz pracytavać hety materyjał, nazyvajecca jon «Vierny sajuźnik», apublikavany 00 hadzin 4 chviliny 5 lutaha 2019 hoda: «Po niekotorym dannym, Kravčienko priedłahał proviesti v Biełoruśsii učienija NATO i raźmiestiť v stranie amierikanskich śpiecialistov po isśledovaniju socialnych sietiej i kontrolu nad intiernietom. Oprošiennyje «Lentoj.ru» ekśpierty nazvali eti śviedienija vieśma dostoviernymi». Nas cikavić pra NATA: ci byli ŭ nas sapraŭdy takija sproby pravieści vučeńni?
— Značyć, pieršaje. Ja prapanoŭvaŭ i prapanoŭvaju vam, spadar Harbacevič, abaviazkova karystacca aficyjnymi krynicami infarmacyi, jakimi źjaŭlajucca internet-partał prezidenta Respubliki Biełaruś, hazieta «SB. Biełaruś siońnia», BiełTA, Vajskovaje infarmacyjnaje ahienctva i h.d.
Druhoje. Kanał «Biełaruskaja praŭda» apublikavaŭ cikavy materyjał: pad nikam «Chromoj Bies» pracuje «Naša Niva», ja tak zrazumieŭ, što heta niepasredna spadar Harbacevič. «Pad maskaj «Chromoho Biesa» chavajucca amatary rasśledavańniaŭ z «Našaj Nivy», jakim hałoŭny redaktar nie daje publikavać takija materyjały praz bojaź atrymać pa rukach, na karyść hetaha śviedčać maniera padačy materyjałaŭ, a taksama prosta varjacki rost padpisčykaŭ kanała, jakich užo bolš za tysiaču», adznačaje kanał «Biełpraŭda» 06.02.2019.
— I jak mnie na heta adreahavać?
— Skažycie mnie jak členu Biełaruskaha sajuza žurnalistaŭ: čamu vy ŭ vojsku nie słužyli, a?
— Pra što vy ŭ mianie pytajeciesia? Tut ja vam zadaju pytańni.
— Ja jak člen Biełaruskaha sajuza žurnalistaŭ pišu čarhovy materyjał. Niaŭžo vy saromiejeciesia svajoj seksualnaj aryjentacyi? U nas vykonvajecca zakanadaŭstva da litary, my nie amierykancy, u nas niama nijakich dyskryminacyj. A, spadar Harbacevič?
— Ja mahu vam zadać sustrečnaje pytańnie: vy što, durak?
— Spadar Harbacevič!
— A što vy mnie raskazvajecie?
— Ja zadaju jak člen Biełaruskaha sajuza žurnalistaŭ, ja artykuł pišu, maju prava vam taksama zadać pytańnie. Čamu ž vy nie chočacie adkazvać na elemientarnaje pytańnie, raspaŭsiudžvajecie pravakacyjnyja materyjały? A z nahody «Biełpraŭdy»: heta praŭda, pad maskaj «Chromoho Biesa» chavajeciesia mienavita vy?
— Vy dašlicie mnie zapyt, ja abviarhaju hetu infarmacyju i prašu adkazać na majo pytańnie.
— Kali łaska, ja taksama prasiŭ by vas adkazać na pytańnie.
— Na jakoje pytańnie?
— Čamu vy nie słužyli ŭ vojsku? Jak vy možacie analizavać niejkuju infarmacyju pra ŭzbrojenyja siły, nie viedajučy elemientarniejšych pytańniaŭ vajskovaj spravy?
— Kab być ministram abarony, treba słužyć u vojsku? [Adsyłka da ministra abarony Rasii Šajhu].
— Treba raźbiracca ŭ elemientarniejšych pytańniach.
— Kab być ministram abarony, treba słužyć u vojsku?
— Jašče raz kažu: treba raźbiracca. A voś vy skažycie: u nas 57-y artykuł Kanstytucyi, što tam napisana?
— Ja nie viedaju.
— «Nie viedaju»… Dyk pahladzicie, kali łaska. Ja taksama voś zaraz rychtuju najcikaviejšy materyjał z hetaj nahody. Darečy, možacie pačytać 30-ha, kali mianie pamiać nie padmanvaje (šukaje), zaraz adkryju, kastryčnika minułaha hoda: «Parotnikaŭ: Palityčny hiermafradytyzm u dziejańni» — heta pieršaje. I druhoje — z nahody asobnych ukidaŭ pravakacyjnaj infarmacyi «Niezaležny» vajskovy ahlad»: dośvied infiernalnaj žurnalistyki», heta na sajcie ŭžo. A? Na internet-partale Ministerstva abarony. Ja jašče raz kažu: karystajciesia aficyjnaj infarmacyjaj, jakaja raźmieščana na internet-partale Ministerstva abarony, — i da vas paciahnucca ludzi, spadar Harbacevič. Ale vy tak i nie adkazali na majo pytańnie. Čamu ž vy ŭ vojsku nie słužyli, a chočacie, miarkujučy pa ŭsim, ledźvie nie ministram abarony stać.
— Ja nie razumieju pytańnia vašaha. U vas jość dostup da kamisaryjatu, spytajcie tam.
— Kaniečnie, my možam spytać, ale nie majem prava publikavać adpaviednuju infarmacyju, tolki kali vy nam asabista skažacie, ale kali vy saromiejeciesia, to kali łaska.
— Ja nie saromiejusia, prosta nie baču sensu z vami havaryć. Možacie tam zapytać.
— A jak nakont telehrama?
— Ja ž vam skazaŭ: ja abviarhaju.
— Abviarhajecie? Dobra, zrazumieŭ, tak i zapišam. Z nahody vašaha pytańnia jašče raz kažu: čytajcie internet-partał Ministerstva abarony.
— A što rabić tym, chto nie čytaje partał Ministerstva abarony?
— Dyk ja vam rekamienduju! Tam usio napisana.
— Dyk a na pytańnie vy što adkazvajecie?
— Pra naša ŭzajemadziejańnie z brackimi krainami, pra našu kaalicyjnuju vajennuju palityku, 20-y artykuł Vajskovaj daktryny.
— Jak vy prakamientujecie infarmacyju, jakuju apublikavała «Lenta.ru»?
— Ja nie budu jaje kamientavać, bo, jašče raz kažu, ja nie kamientuju čutki.
— Usio, jasna. Da pabačeńnia!
* * *
Načalnikam upraŭleńnia infarmacyi hałoŭnaha ŭpraŭleńnia ideałahičnaj pracy Ministerstva abarony pracuje 63-hadovy pałkoŭnik Uładzimir Makaraŭ. Jon naradziŭsia ŭ rasijskim Čalabinsku, skončyŭ Śviardłoŭskaje vyšejšaje vajenna-palityčnaje tankava-artyleryjskaje vučylišča, a paśla Humanitarnuju akademiju ŭzbrojenych sił Rasii. Byŭ zampalitam u Biełarusi i na Kubie.
Zadača Makarava techničnaja — pradastaŭlać u ŚMI źviestki, datyčnyja Ministerstva abarony. Adnak časam jon biare inicyjatyvu na siabie.
