Źjaviłasia viersija, chto zamienić Kapskaha ŭ BATE
Pra heta namieśnik hiendyrektara FK BATE ŭ siaredzinie «nulavych» Uładzimir Alejnikaŭ raskazaŭ u intervju z karespandentam «Presboła» Uładzimiram Pirahom.
«Uspaminajučy apošniuju hutarku z Tolem za try dni da jaho śmierci, miarkuju, što heta budzie syn Andrej, — skazaŭ Alejnikaŭ, adkazvajučy na pytańnie, chto zamienić Kapskaha na pasadzie kiraŭnika kłuba. — A tady, stary durań, ja naohuł nie zrazumieŭ, što na jaho najšło? Sorak chvilin pa telefonie - nikoli tak doŭha nie kazali. Piać-dziesiać, a časam i chviliny chapała - kali łajacca. I hałoŭnaje, ni słova pra futboł!… Siemji, dzieci, unuki - i ni razu pra svajo zdaroŭje».
Staršynia praŭleńnia FK BATE Anatol Kapski pamior 22 vieraśnia, na 53-m hodzie žyćcia.
Fota: FK BATE
Anatola Kapskaha ličyli samym efiektyŭnym spartyŭnym mieniedžaram Biełarusi dy i, mabyć, usioj postsavieckaj prastory. Na terytoryi byłoha SSSR składana adšukać jašče adzin spartyŭny prajekt, jaki pry adnosna ścipłym biudžecie taki doŭhi pieryjad pakazvaŭ b dobryja, a časam i vybitnyja, vyniki.
Kapski pracavaŭ hiendyrektaram BATE z červienia 2005 hoda. U apošnija hady ŭ jaho byli prablemy sa zdaroŭjem. U žniŭni 2017-ha Anatol Kapski pakinuŭ pasadu hiendyrektara AAT «BATE» (Barysaŭskaha zavoda aŭtatraktarnaha elektraabstalavańnia, kirujučaj kampanii chołdynhu «Aŭtakampanienty») i zastavaŭsia staršynioj praŭleńnia futbolnaha kłuba.
Amal 50 faktaŭ pra Anatola Kapskaha — lepšaha mieniedžara biełaruskaha futboła
Anatol Kapski i jaho BATE: žyćcio pamiž futbołam i zavodam (archiŭny materyjał, upieršyniu byŭ apublikavany ŭ 2014)
