Giveaway nie ŭdaŭsia: błohiera abvinavacili ŭ razvodzie na hrošy praź instahram z dapamohaj Ułada Bumahi
Błohier Mikita @wlkmn (@wlkmn u telehramie) abvinavaciŭ inšaha błohiera Ułada Konaša (Kanašenku), u niesumlennym praviadzieńni konkursu giveaway. U vyniku zakranutaj akazałasia i reputacyja viadomaha biełaruskaha videabłohiera Ułada Bumahi, jaki toj konkurs rekłamavaŭ. Pramoŭtary Bumahi ličyć abvinavačvańni nadumanymi. «Razumnamu čałavieku vidavočna, što takija vialikija sumy nichto nie staŭ by ŭkładać u rozyhryšy», — skazaŭ «Našaj Nivie» Źmicier Radčanka, pradstaŭnik biełaruskaha ahienctva MediaCube.Network, jakoje zajmajecca prasoŭvańniem Bumahi.
Mikita chacieŭ raskrucić svoj instahram i hatovy byŭ za heta płacić.
Što takoje giveaway i jak na im zarablajuć
Giveaway, hiveŭej, ci prosta hiv — heta rozyhryš pryzoŭ u instahramie ŭzamien za padpisku na staronku — ad anhł. giveaway — addavać, daryć. Dziejničaje heta tak. Kab udzielničać u łatarei, karystalniki pavinny padpisacca na staronku «sponsara» — taho, chto pryzy razdaje. Profit dla sponsara ŭ tym, što jon takim čynam atrymlivaje bolš padpisčykaŭ, a heta značyć, prestyž u svaim asiarodździ.
Apošnim časam hiveŭei ładziać na kamiercyjnaj asnovie. Tady taki konkurs arhanizoŭvaje nie sam uładalnik instahrama, a śpiecyjalnyja rekłamnyja ahienctvy ci inšyja błohiery. U takim razie staronku konkursu rekłamujuć zaprošanyja «zorki». U vypadku, pra jaki idzie havorka, takim błohieram-«matoram» byŭ Uład Bumaha.
Biełarus Uład Bumaha — videabłohier, jaki aktyŭna zarablaje na svajoj papularnaści siarod padletkaŭ šlacham udziełu ŭ rekłamie. Na ilustracyjnym fota — padčas sustrečy z čytačami ź Minsku.
Mieniedžar prajektaŭ pramysłovaj kampanii Mikita@wlkmn žyvie i pracuje ŭ Maskvie. U instahramie i inšych sacsietkach jon piša pra vandroŭki, architekturu, nacyjanalnuju kuchniu, admietnyja stravy. Jaho staronka ŭ instahram maje kala 70 tysiač padpisčykaŭ. Mikita raniej udzielničaŭ u niekalkich giveaway i zastavaŭsia zadavoleny. Ale ŭ konkursie, arhanizavanym Uładzisłavam Konašam (Kanašenkam), za jakim možna było sačyć na voś hetaj staroncy, usio było inakš, narakaje Mikita.
Uład Konaš — arhanizatar hivaŭ. Fota z sacyjalnych sietak.
Hiv premium-kłasa
Pa-pieršaje, značna vyrasła cana ŭdziełu — ledź nie ŭ dva razy. Za ŭdzieł u raniejšych hivach Mikita płaciŭ 100 tysiač rasijskich rubloŭ, ciapier ža Konaš ź jaho zaprasiŭ 180. U vyniku damovilisia na 150 (heta kala 5000 biełaruskich).
Uład Konaš u adnym ź intervju zaviaraŭ, što heta «hiv novaha ŭzroŭniu — premium-kłasa». Maŭlaŭ, zabraniravanyja rekłamnyja pasty ŭ 35 błohieraŭ, idzie praca nad stvareńniem videarolikaŭ. Abiacaŭ sumarnuju aŭdytoryju bolš jak 20 miljonaŭ čałaviek…
Mikita śćviardžaje, što pierasłaŭ hrošy za ŭdzieł na Jandeks-kašalok pieradapłataj. Abiacałasia, što ŭdzielniki hiva ŭ vyniku praviadzieńnia rekłamnaj hulni atrymajuć kala 100 tysiač novych sapraŭdnych padpisčykaŭ, a 95 tysiač ź ich zastanucca stałymi padpisčykami akaŭnta. Ale ŭ vyniku ličba ledź daciahvała da 20 tysiač.
Mikita vyrašyŭ zapatrabavać hrošy nazad, bo paličyŭ, što prajekt siabie nie apraŭdaŭ.
— Heta nie adziny taki konkurs, i jość praviła, kali abiacańni nie vykonvajucca, to jość mahčymaść viarnuć hrošy, — kaža Mikita.
Mikita kaža, što kantrakta miž arhanizatarami konkursu i ŭdzielnikami-«sponsarami» ŭ tradycyjnym vyhladzie nie isnuje. «Pahadnieńnie ab nadańni pasłuh» — heta vordaŭski fajł, u jakim apisanyja tolki asnoŭnyja ŭmovy praviadzieńnia hulni i padadzienyja asnoŭnyja ŭmovy ŭdziełu, suma ŭniosku (jak akazałasia, kožny z udzielnikaŭ płaciŭ roznyja hrošy). Hety dakumient adpraŭlaŭsia ŭdzielnikam praź internet, ale jurydyčna nijakim čynam nie zavierany ni podpisami, ni piačatkami. A Mikita i takoha fajła ad Konaša nie atrymaŭ. Daviedaŭsia ab jaho isnavańni tolki ad inšaj udzielnicy hiva.
3 tydni tamu Mikita ŭ pierapiscy ŭ telehram zapatrabavaŭ ad Ułada Konaša viarnuć hrošy. Arhanizatar pahadziŭsia abmierkavać sumu, što musić być viernutaja. A paśla pačałasia pierapiska kštałtu: my hrošy dasłali, pačakajcie… Konkursnuju staronku vydalili, profili pačyścili, jak ničoha i nie było, Uład Konaš, piša Mikita, pierastaŭ vychodzić na suviaź.
Voś niekalki skrynoŭ pierapiski:
Uskosna akazaŭsia zakranuty i Uład Bumaha, jaki staŭ udzielnikam adnaho z rekłamnych rolikaŭ hiva, zaklikaŭ padpisacca na staronki sponsaraŭ, paabiacaŭ razyhrać abiacanyja ajfony i prasačyć za tym, kab jany byli dasłanyja pieramožcam.
— Tradycyjna pry arhanizacyi giveaway pryniata stvarać čaty dla sponsaraŭ, jakija ŭkłali srodki ŭ prajekt. Heta niejkim čynam ich kansaliduje i dazvalaje ŭsim razam sačyć za chodam. Ale na hety raz takoha čata nie było stvorana. Tamu niejkim čynam abjadnać namahańni ŭ sprobach viarnuć zmarnavanyja hrošy składaniej, — dadaje Mikita.
Jon užo znajšoŭ niekalki čałaviek-udzielnikaŭ giveaway. Razam jany spadziajucca viarnuć srodki.
Što kažuć arhanizatary?
Błohier Uład Konaš adkazaŭ nam, što ŭsie abaviazacielstvy pa hivie vykananyja, nichto nikoha nie «kidaŭ».
— Rozyhryšy praviedzienyja, pryzy razdadzienyja, a staronku hiva zabłakavaŭ sam Instagram, — śćviardžaje Konaš.
Mikita ličyć, što Konaš na konkursie zarabiŭ 5 miljonaŭ rasijskich rubloŭ (87 tysiač dalaraŭ). Niaŭžo hivy majuć takija hihanckija abaroty? Konaš admaŭlaje:
— My sabrali mienš udzielnikaŭ, čym płanavałasia, dyj suma vyjšła mienšaja.
Na pytańnie pra niavykananyja zabaviazańni pa pryroście padpisčykaŭ dla sponsaraŭ Uład adkazaŭ, što ŭsio sumlenna i punkty, prapisanyja ŭ «pahadnieńni», vykananyja.
A ci zakonna?
U pravaachoŭnyja orhany Mikita nie źviartaŭsia. Ci aznačaje heta, što jany nie majuć dastatkovych dokazaŭ svaim słovam?
Pradstaŭnik biełaruskaha ahienctva MediaCube.Network, jakoje zajmajecca prasoŭvańniem Bumahi, daŭ zrazumieć, što jany da instahramnych spraŭ błohieraŭ nijakaha dačynieńnia nie majuć.
«Miedyjakub» — kampanija-partnior Jutuba, instahram ža źjaŭlajecca asabistym zachapleńniem błohieraŭ. Pytacca ŭ nas pra ich dziejnaść tam — heta toje ž samaje, kali b pacikavilisia, ci viedaju ja, što moj susied zabivaje ludziej. Biez paniaćcia, moža, tam u jaho ŭsia chata ŭ trupach», — prakamientavaŭ mieniedžar «MediaCube.Network» Źmicier Radčanka.
Ale jon padzialiŭsia svaimi zdahadkami pa temie: «Kali ŭvažliva pahladzieć hety rolik z «dokazami» — tam ich niama, pa-mojmu. Čałaviek abvinavačvaje Ułada Bumahu ŭ kradziažy hrošaj, ale lubomu razumnamu čałavieku vidavočna, što takija vialikija sumy nichto navat i nie staŭ by ŭkładać u rozyhryšy. Mnie prosta śmiešna, što presa padchapiła takoje videa: biez dokazaŭ, ź niejkimi niezrazumiełymi skrynšotami.
Było b heta, sapraŭdy, rasśledavańnie uzroŭniu Navalnaha, naprykład — tady b možna było pra niešta vieści havorku. Kali b ja byŭ na miescy Ułada, mnie było b vielmi niepryjemna, što ludzi vierać u historyju, jakuju razdźmuli z palca».
Dziaŭčyna ž Ułada, błohierka Julija Hadunova, skazała, što nie lezie ŭ asabistyja spravy chłopca i nie ŭ kursie hetaj temy. Na prapanovu dać mahčymaść vykazacca samomu Uładu niepasredna jana adkazała nastupnaje: «Jamu heta nie cikava».
Ludziam starejšaha pakaleńnia, jakija ŭ sacyjalnych sietkach nieprysutnyja, moža być navat dziŭna, jakija žarści tam ciapier paroj razhortvajucca.
