Adhrabać dźviuma rukami
Piša Staś Karpaŭ.
Piersanalna mnie padabajecca, što Łukašenka zaraz vystupaje pasrednikam u mirnych pieramovach pa Ukrainie. Heta ŭsialaje niekatory aptymizm. Kaniečnie, jak skazaŭ u svoj čas Karbalevič, kali AHŁ kaža, što niečaha nie choča ci niečaha nie robić — značyć dakładna i robić? i choča. Tak što kali jon pierakonvaje, što rola pasrednika pa Ukrainie jamu zusim nie padabajecca — značyć, što być takim pasrednikam jon zaŭždy chacieŭ bolej za ŭsio ŭ śviecie.
Prosta, na maju ścipłuju dumku,
Łukašenka adčuŭ, što treba znoŭ stanavicca «niebieznadziejnym» u vačach Zachada. Asabliva, kali status «absalutna bieznadziejnaha» nabyvaje Pucin.
Zrazumieła, što hetyja pieramovy pamiž terarystami, Rasijaj i Ukrainaj ni da čaho nie pryviaduć, ale mienavita heta i padabajecca Łukašenku. Jon viedaje, što Zachad strašna lubić vieści biaskoncyja pieramovy i toj fakt, što jany nie majuć šanca na pośpiech abaznačaje adsutnaść usialakaj adkaznaści za vynik, pry hetym ty jak maderatar pieramovaŭ vyhladaješ samym zacikaŭlenym i samym važnym ich subjektam.
Biełaruś — apošniaja kraina, jakuju pakul spansiruje Rasija.
Finansaŭ nie chapaje ŭžo navat na Abchaziju. Što tryvožna. Jašče adnym tryvožnym zvankom stała toje, što rasijski ŭrad tolki što zapuściŭ ruku ŭ nakapicielnuju častku piensij svaich hramadzianaŭ. Inakš kažučy «pazyčyŭ» hrošy. Ale jak tut addasi?
Nu, dapuścim, siektaralnyja sankcyi Rasija pieražyvie, chacia lepiej joj, naturalna, nie stanie. Nu, dapuścim, 50 młrd pa spravie JUKASu možna asprečvać jašče hod-dva. Ale voś ź Irana zdymajuć sankcyi, a heta najbujniejšy ŭłaśnik hazu ŭ śviecie (Rasija na druhim miescy) i treci ŭ śpisie krain, jakija zdabyvajuć naftu. Što heta značyć dla Rasii? Heta značyć što
kali nafta apuścicca nižej za 90$, jany nie źviarstajuć biudžet i scenar Savieckaha Sajuza padasca nie takim užo i nievierahodnym.
Plus im treba vykonvać svaje abaviazki pierad Kitajem, bo kantrakt padpisany i ciapier treba avansam raźviedać radoviščy i pabudavać hazapravod, košt budaŭnictva jakoha jany acanili u 70 młrd dalaraŭ. Nie zabyvajem i pra toje, što kali Polšča i Ukraina narešcie pačnuć zdabyču słancavaha hazu z sabiekoštam zdabyčy ŭ rajonie 120$ za 1000 kuboŭ — jany takim čynam zafiksujuć niejkuju raŭnavažnuju canu, pa jakoj svoj haz (ź nizkim sabiekoštam zdabyčy) zmoža pradavać Rasija. I heta budzie, kaniečnie, nie 380-415$, jakija jany zaraz pa-bratersku prapanujuć Ukrainie – bujnamu klijentu «Hazproma», jaki štohod kuplaje kala 20 młrd kubamietraŭ. A toj fakt, što abjom pastavak tudy užo skaraciŭsia na 23% — adzin z čyńnikaŭ, jakija vielmi niervujuć Rasiju.
Karaciej, kali skłaści usie hetyja čyńniki, možna zrazumieć, što Rasiju — nie vyklučana — čakaje niekatory pindyk u hetaj suviazi. I Łukašenka nie apošni, kaho heta niepakoić.
Jon razumieje, što kali Rasija hrošaj nie daść, dyk adzinaje miesca, dzie ich daduć i šmat nie paprosiać — heta Jeŭropa. Tak, patrebnyja buduć reformy, tak, skaračeńni sacprahram, tak, pryvatyzacyja, tak — vybary. Ale heta nie hałodnyja bunty. I heta — paślazaŭtra.
Tamu siońnia jon strachujecca i pačanaje budavać sabie imidž novaha, niebieznadziejnaha dziadźki, jaki voś užo i pa-biełarusku razmaŭlaje, voś užo i za cełasnaść i stabilnaść u «našaj Ukrainie», voś užo śviecicca profilem na humanitarnych pratakolnych mierapryjemstvach.
Ź inšaha boku, kali Rasiju nakryje fiekalnaj chvalaj vynikaŭ jaje ž dziejnaści — tut, unutry našaj susiedki, moža źjavicca nie pazbaŭlenaja prahmatyzmu dumka, što «vajna narodnaja, śviaščennaja vajna», asabliva kali «Krym naš» i narod užo kančatkova «ŭstaŭ z kalen» — sprava nie bieznadziejnaja i nie bieskarysnaja.
I ŭ hety momant Alaksandru Ryhoraviču moža być prapanavana narešcie spraŭdzić svaju daŭniuju maru-abiacańnie stać hrudźmi na šlachu nataŭskaj tankavaj kałony. Ale ž heta značna pryjemniej rabić u teoryi, pierad kamierami, čym u reale, na śviežaadramantavanaj za jeŭrasajuzaŭskija hrošy trasie Minsk-Brest.
Asabliva ŭśviedamlajučy roźnicu vajskovych biudžetaŭ NATA i ADKB. Tamu ŭ razvahach da kaho prytknucca naš kiraŭnik u svaim čoŭnie hrabie pakul tolki adnoj dałanioj i apisvaje nievialikija kruhi vakoł kropki ŭ rajonie Drazdoŭ. Hrabie i dumaje. A mnie chočacca pieradać jamu pryvitańnie i paprasić nie dumać, a adhrabać ad Rasii jak śled. Dźviuma rukami.
