Na padrychtoŭku Łanskoj da «Jeŭrabačańnia» sponsary pieraviali 4 młrd rubloŭ
Heta jašče nie ŭsie traty, vynikovaja suma pavinna być «značna bolšaja», — kaža pradziusar śpiavački Dźmitryj Baranaŭ.
Na padrychtoŭku Alony Łanskoj da konkursu pieśni «Jeŭrabačańnia» sponsary pieraličyli dva tranšy pa 2 młrd. rubloŭ, paviedamiŭ BiełaPAN pradziusar śpiavački Dźmitryj Baranaŭ.
«Sioleta my znajšli sponsara. Heta viadomy biźniesmien Mikałaj Varabiej z Navapołacka, haspadar i kiraŭnik kampanii TAA «Interservis» (kampanija zajmajecca aptovymi pastaŭkami nafty na pierapracoŭku i prodažam naftapraduktaŭ na biełaruskim i mižnarodnym rynkach. — BiełaPAN.)», — raskazaŭ pradziusar.
«Nam dapamahajuć hrupa kampanij «PMI-hrup» i kampanija «Spamaš-hrup», jakoj naležyć pradziusarski centr «Spamaš» (abiedźvie kampanii naležać viadomamu biełaruskamu biźniesmienu Alaksandru Šakucinu, staršyni savieta dyrektaraŭ AAT «Amkador», namieśniku hiendyrektara ZAT «Prammiedinviest». — BiełaPAN.). I ja vielmi ŭdziačny hetym ludziam i ich kampanijam. Tamu što dziakujučy ich dapamozie ŭ nas jość mahčymaść jeździć u proma-tury, rabić pastanoŭku numara, zdymać klipy i prosta zajmacca tvorčaściu», — adznačyŭ Baranaŭ.
Jon dadaŭ, što zhadanyja 4 młrd. rubloŭ — jašče nie ŭsie traty, vynikovaja suma pavinna być «značna bolšaja». «Udzieł u konkursie «Jeŭrabačańnie», jak i ŭ lubych inšych mižnarodnych spartyŭnych ci kulturnych spabornictvach, niatannaje zadavalnieńnie», — kanstatavaŭ Baranaŭ.
Pavodle jaho słoŭ, 250 tys. dalaraŭ sponsarskich srodkaŭ było vydatkavana tolki na proma-pradukcyju. U śpisie — prykładna 50 najmieńniaŭ, ad tysiačy plašak harełki i takoj ža kolkaści šakaładak «Alonka» da fłešak i dekaratyŭnaj płaniety Solayoh.
«Sioleta ŭ nas vielmi šmat najmieńniaŭ proma-pradukcyi, — adznačyŭ Baranaŭ. — Bo kali artyst pryjazdžaje na «Jeŭrabačańnie», uźnikaje vialikaja cikavaść nie tolki da jaho i jaho pieśni, ale i da krainy.Pry dapamozie hetaha konkursu možna raskazvać i pra našu dziaržavu, pra našu kulturu, historyju, nacyjanalnych tavaravytvorcaŭ. Heta važna i dla brendynhu samoj dziaržavy. Tamu tak i šmat usiaho»".
Pavodle słoŭ pradziusara, rašeńnie ab kolkaści, najmieńniach i takim šyrokim asartymiencie proma-pradukcyi prymałasia sponsarami.
Ciapier śpiavačka i jaje kamanda znachodziacca ŭ Sierbii, «adtočvajuć numar».
«Padrychtoŭka da konkursu «Jeŭrabačańnie» vyjšła na finišnuju pramuju. Ciapier, i heta narmalnaja praktyka, my prosta adtočvajem numar, — raskazaŭ Baranaŭ.— My arandujem chareahrafičnuju zału, u jakoj staić prafiesijnaje hukaŭzmacnialnaje abstalavańnie, i Alona razam z bek-vakalistami i tancorami adtočvaje numar — tak, jak heta ŭžo budzie adbyvacca na vialikaj scenie ŭ Malmio. Čamu ŭ Sierbii? Tamu što z nami pracuje sierbski chareohraf-pastanoŭščyk Zile-Aleks Rajfovič. My pracujem takoj družnaj internacyjanalnaj kamandaj. Taksama siudy pryjechaŭ bielhijski aŭtar pieśni Mark Pajlink. Na scenie z Alonaj buduć znachodzicca dźvie bek-vakalistki ź Sierbii, dva tancoŭščyki sa Słavienii i Hiermanii i treci małady čałaviek z PAR, jaki budzie i na beku, i na padtancoŭcy».
Sam numar, pavodle jaho słoŭ, budzie pryśviečany płaniecie lubvi. «Naš słohan Solayoh — is planet of love, heta značyć «Salea — płanieta lubovi», — padzialiŭsia Baranaŭ. — I ahulnaja ideja ŭ tym, što heta peŭnaja płanieta, na jakoj žyvuć dobryja i pazityŭnyja ludzi.I Alona, jak pasłanka hetaj płaniety, pryjšła padzialicca idejami dabra, humanizmu. I voś hety pazityŭ i dobrazyčlivaść, nastroj lubvi jana i choča pieradać svajoj pieśniaj. Tamu na scenie źjavicca dyska-šar, jaki budzie niepasredna imitavać hetu płanietu i ź jakoha budzie vychodzić Alona. A dalej my ŭžo pry dapamozie chareahrafičnaj pastanoŭki budziem raźvivać našu ideju».
28—29 krasavika ŭ Alony Łanskoj u miežach proma-tura zapłanavany vystupleńni i intervju ŭ Bielhii. 30 krasavika śpiavačka vierniecca ŭ Minsk, dzie buduć prachodzić repietycyi na scenie Maładziožnaha teatra estrady, a 4 maja sa svajoj kamandaj palacić u Malmio.
