«Забыўся адвязаць і паехаў так». На ферме пракаментавалі шакуючае відэа з цялём, прывязаным да машыны
У сеціве з'явілася відэа, у якім бачна, як у Лёзненскім раёне па вясковай дарозе цягнуць цяля, прывязанае да машыны. Пішуць, што калі аўто выязджала з фермы, цяля нібыта яшчэ было жывым. Што кажуць на ферме?
Скрышот відэа тэлеграм-канала «Беларусь за МКАДам»
Відэа знялі яшчэ 19 студзеня ў вёсцы Зубкі. Інцыдэнт здарыўся ў сельгасфіліяле «Чкалаўскі». Там кажуць, што ўсё было не так, як паказалі ў інтэрнэце.
«Гэтае цяля нарадзілася мёртвым. Яго ўскрылі, адчыталіся ў раён. Ветэрынару трэба было адвезці яго на жывёльны могільнік. Там сто метраў адлегласць, ну не на руках жа несці. Прычапіў да машыны, каб хутчэй.
А потым ён пайшоў асемяняць карову, забыўся адвязаць і паехаў так», — кажа Валянціна Курчава, в.а. начальніка сельгасфіліяла.
Ветэрынара за гэты інцыдэнт дэпрэміравалі. А на вяскоўца, які зняў відэа і абвінаваціў прадпрыемства ў жывадзёрстве, падалі ў міліцыю за паклёп.
Чытайце таксама: Пад Ракавам сын на аўтамабілі насмерць збіў бацьку
