«Выкрыкваў лозунгі, пляскаў у далоні»: удзельніку жнівеньскіх пратэстаў далі тры гады «хіміі»
У судзе Заводскага раёна вынесены прысуд 33-гадоваму Максіму Пражэніку. Суддзя Алег Каляда прызнаў яго вінаватым паводле ч. 1 арт. 342 Крымінальнага кодэкса і асудзіў да трох гадоў «хіміі».
Іск «Мінсктранса» на суму 3621,94 рубля будзе вылучаны ў асобную грамадзянскую вытворчасць.
Максіма абвінавачвалі ў тым, што ў ноч пасля выбараў ён «прымаў актыўны ўдзел у дзеяннях, якія груба парушаюць грамадскі парадак, не падпарадкаваўся патрабаванням супрацоўнікаў міліцыі, выкрыкваў лозунгі, пляскаў у далоні, рухаўся па праезнай частцы ў счэпцы», паведамляюць праваабаронцы.
Мужчына прызнаў віну і распавёў, што 9 жніўня выйшаў у цэнтр, каб «паказаць, што мы прагаласавалі». Ён пагадзіўся не з усім абвінавачаннем: сказаў, што не разумее, адкуль узялася такая сума іска, калі ён быў не адзін.
