Вахцёрку інтэрната асудзілі на 1,5 года хіміі за абразу сяржанта міліцыі
Адбыўся разгляд яшчэ адной крымінальнай справы за публічную абразу прадстаўніка ўлады (арт. 369 КК). Гэтым разам на лаве падсудных апынулася 51-гадовая Вера Струніна, якая працуе вахцёркай у віцебскім інтэрнаце — яна размясціла кароткі каментар на адрас віцебскага міліцыянта Віталя Шнявіна, які ўжо звольніўся з міліцыі, паведамляюць праваабаронцы.
Каментар быў пакінуты пад фотаздымкам, на якім міліцыянт распыльвае газ на грамадзян. Гэты запіс і негатыўныя каментары пад ім убачыла 34-гадовая хатняя гаспадыня Наталля Селюкова — яна і звярнулася ў міліцыю з просьбай даць ім прававую ацэнку.
Суддзя Дзяніс Аляксеенка прызнаў жанчыну вінаватай і пастанавіў пакараць яе абмежаваннем волі на 1 год і 6 месяцаў з адбываннем тэрміну ў папраўчай установе адкрытага тыпу. Таксама Вера Струніна мусіць выплаціць пацярпеламу 500 рублёў кампенсацыі. Мабільны тэлефон «Самсунг», за які яшчэ не выплачаная растэрміноўка, канфіскаваны.