Магілёўскі абласны драматычны тэатр падтрымаў купалаўцаў і патрабуе новых выбараў
Магілёўскі абласны драматычны тэатр выступіў з адкрытым зваротам, у якім асуджае беспрэцэдэнтны ціск на грамадзянскую супольнасць дзяржаўных органаў.
«Улады абавязаны прыслухоўвацца да меркавання беларускага грамадства, значная частка якога патрабуе адстаўкі канкрэтных прадстаўнікоў улады, дзейсных рэформ, неадкладнага вызвалення ўсіх палітвязняў і расследавання ўсіх выпадкаў злачынстваў супраць мірных грамадзян, у тым ліку збіццё, прыніжэнні, пагрозы і забойствы», — заклікаюць работнікі тэатра.
Падпісанты звароту патрабуюць не дапускаць закрыцця тэатраў праз палітычныя погляды іх работнікаў (як здарылася з Купалаўскім тэатрам), спыніць гвалт з боку сілавых органаў, а таксама шантаж работнікаў з боку кіраўнікоў прадпрыемстваў (тут згадваецца, напрыклад, пра ціск на работнікаў Магілёўскага мастацкага музея).
У адкрытым лісце тэатральныя работнікі таксама заклікаюць дзяржаўныя СМІ спыніць скажэнне інфармацыі пра падзеі, якія адбываюцца ў грамадстве, а ва ўладаў патрабуюць правядзення новых дэмакратычных і празрыстых выбараў.
Агулам пад зваротам падпісаліся 26 супрацоўнікаў тэатра.
