У Крыме загінуў Z-блогер «Міша з Канады»
У Севастопалі загінуў блогер Міхаіл Каспераў
Міхаіл Каспераў. Фота: сацыяльныя сеткі
Байкер-відэаблогер Міхаіл Каспераў, вядомы як «Міша з Канады», загінуў у ДТЗ у Севастопалі, паведаміў РІА Навіны яго таварыш, крымскі палітычны аглядальнік Сяргей Весялоўскі.
«На жаль, мінулай ноччу адбылася трагедыя. Загінуў Міхаіл Каспераў. Мне на досвітку патэлефанаваў наш агульны сябар Сяргей і сказаў, што Міхаіл разбіўся», — сказаў Весялоўскі.
Каспераў доўгі час жыў у Канадзе і ў канцы мінулага года пераехаў у анексаваны Крым. Вёў палітычны YouTube-канал «Міша з Канады».
«Ён расійскі відэаблогер і патрыёт Расіі, які ў Канадзе некалькі гадоў вёў інфармацыйную вайну супраць Захаду. Калі яго там зусім прыціснулі, ён сабраў рэчы, адправіў іх кантэйнерам, а сам з матацыклам пераляцеў акіян і з Парыжа вельмі доўга акружным шляхам праз некалькі еўрапейскіх краін дабіраўся да Севастопаля», — сказаў Весялоўскі.
У прэс-службе паліцыі горада паведамілі аб ДТЗ мінулай ноччу з удзелам матацыкла і легкавушкі. Пры гэтым асобы ўдзельнікаў дарожнай аварыі не называліся.
Паводле звестак паліцыі, 57-гадовы кіроўца Harley-Davidson выехаў на сустрэчную паласу і сутыкнуўся з легкавіком.
Чытайце таксама:
На вайне ва Украіне загінуў прапагандыст з расійскіх «Ізвестій»
У выніку ўкраінскага ўдару па Луганску загінуў камандзір 59-й брыгады
Выкрадзенага ў «ДНР» амерыканскага ваенкара Расэла Бэнтлі забілі
