Даходы Беларусі ад экспарту калію ў Кітай зменшыліся ўдвая
Галоўнае мытнае ўпраўленне Кітая апублікавала даныя па імпарце калійных угнаенняў за студзень — люты 2024 года. Выданне Myfin.by параўнала, якія пазіцыі на кітайскім рынку цяпер займаюць Беларусь і іншыя краіны. Выявілася, што ў параўнанні з аналагічным перыядам мінулага года беларускі экспарт калію ў Кітай зменшыўся ўдвая.
Па папярэдніх даных кітайскага боку, у студзені — лютым 2024 года сукупны аб'ём імпарту КНР па таварнай пазіцыі «ўгнаенні мінеральныя або хімічныя, калійныя» склаў $853,6 млн. У мінулым годзе было больш, але не нашмат — $895,3 млн.
У пачатку 2024 года найбольшы аб'ём закупак калію (у грашовым выражэнні) Кітай зрабіў з Расіі — $286,9 млн. Імпарт з Канады склаў $241,2 млн, а з Беларусі — $141,9 млн.
Такім чынам, Беларусь з першага месца пастаўшчыкоў калію ў Кітай, на якім была ў пачатку мінулага года, перамясцілася зноў на трэцяе, на якім была і ў 2022 годзе.
Галоўнае ж — што грошай ад гэтых паставак атрымалася практычна ў палову менш — за першыя два месяцы 2023 года Беларусь паставіла ў Кітай калійных угнаенняў на $281,8 млн.
За ўвесь 2023 год Кітайская Народная Рэспубліка імпартавала калійных угнаенняў на $4,75 млрд. Найбольшы аб'ём закупак (па цане) прыпадаў на Беларусь: каля $1,46 млрд. Агульны леташні кітайскі імпарт калію з Расіі летась склаў $1,13 млрд, з Канады — $803,1 млн, з Лаоса — $630,1 млн, з Іарданіі — $333,7 млн, з Ізраіля — $313,0 млн.
Чытайце таксама:
Індыя адмовілася ад беларускага калію на карысць расійскага
Чым пагражае беларускай эканоміцы продаж угнаенняў па дэмпінгавых цэнах
Спрэчка з Беларуссю наконт транзіту ўгнаенняў каштавала Літве €320 тысяч
