У Беларусі прадаецца Jetta VA3, але гэта не VW і не VAZ. Колькі каштуе?
На av.by у продажы з'явіўся аўтамабіль маркі Jetta. За новы седан са знаёмай кожнаму беларускаму аўтааматару назвай просяць 18 тысяч даляраў. Што сабой уяўляе кітайскі рымэйк папулярнай мадэлі VW?
Фота: av.by
Не мадэль, а асобная марка
Аўтамабілістам слова «Jetta» знаёмае даўно, бо VW выпускае мадэль пад такой назвай, пачынаючы з 1979 года. Але аўтамабіль, пра які ідзе гаворка, мае мала агульнага з VW Jetta, паколькі ў дадзеным выпадку Jetta гэта не назва мадэлі, а асобная марка аўто.
Новы кітайскі аўтамабільны брэнд быў створаны канцэрнам Volkswagen разам са сваім партнёрам па сумесным прадпрыемстве FAW Group у 2019 годзе.
Напэўна, калі б не вайна і санкцыі, беларускія аўтааматары маглі б і далей нічога не ведаць пра існаванне такіх аўто. Але рэальнасць паказвае іншае: доля кітайскіх марак сярод новых легкавых аўтамабіляў у продажы перавышае 80%.
Аўтамабіль маркі Jetta мае пад капотам бензінавы рухавік аб'ёмам 1,5 літра, працуе ён у пары з аўтаматычнай каробкай перадач.
Фота: av.by
Polo Sedan вяртаецца?
Тэхнічна гэты аўтамабіль нічога агульнага з седанам VW Jetta асабліва не мае. Мадэль VA3 пабудаваная на той самай базе, што і VW Polo sedan, які раней выпускалі ў тым ліку на заводзе VW у Расіі. У свой час Polo sedan займаў першыя радкі ў продажах новых аўто ў Беларусі.
Фота: av.by
Знешняе падабенства VW Polo sedan з Jetta VA3 лепш за ўсё бачна, калі глядзець на аўтамабіль збоку. Пярэдняя частка больш падобная да сучаснага VW Polo, а вось з тылу аўтамабіль, можна сказаць, выглядае ўнікальна.
Фота: av.by
Агульныя рысы таксама праглядаюцца ў інтэр'еры аўтамабіля.
Новы бестселер?
Ці атрымаецца ў Jetta VA3 паўтарыць поспех VW Polo sedan, копіяй якога з'яўляецца гэты аўтамабіль — вялікае пытанне. З аднаго боку, гэта даволі просты аўтамабіль, які добра сябе зарэкамендаваў, хоць і ў кітайскай шкуры, а з іншага — даволі старая мадэль. Апроч гэтага, кітайцы месцамі спрасцілі і без таго простую мадэль, якая прадавалася толькі ў краінах трэцяга свету (VW Polo sedan не прадаваўся ў Еўропе). У Jetta VA3, напрыклад, нельга адкінуць задні рад крэслаў, каб павялічыць аб'ём багажнага адсека.
У той жа час 18 тысяч даляраў за новы аўтамабіль на аўтамаце ў сучасных умовах не так ужо і шмат. Прыкладна столькі каштуе Geely Emgrand з АКПП.
На момант з'яўлення на рынку Кітая ў 2019 годзе Jetta VA3 прадаваліся па цэнах ад 11 300 да 15 100 даляраў.
Чытайце таксама:
«Прадаецца толькі на РФ». Як у Беларусі з'яўляюцца аўтамабілі з Еўропы, якія нельга набыць мясцовым
VW упершыню паказаў новы Transporter. Фанаты маркі могуць быць расчараваныя, бо гэта будзе не зусім Volkswagen
