Колькасць загінулых падчас учорашняга абстрэлу Херсона вырасла да 23 чалавек
Пасля ўчорашняга абстрэлу расійскімі захопнікамі горада Херсон і вобласці колькасць загінулых грамадзян узрасла да 23 чалавек, паведаміў кіраўнік Херсонскай абласной вайсковай адміністрацыі Аляксандр Пракудзін у тэлеграме.
«За мінулыя суткі праціўнік здзейсніў 98 абстрэлаў, выпусціўшы 539 снарадаў з цяжкай артылерыі, «Градаў», танкаў, БПЛА і авіяцыі», — напісаў Пракудзін.
У прыватнасці, горад Херсон вораг абстраляў 16 разоў. Падчас абстрэлаў расійскія вайскоўцы пацэлілі ў жылыя кварталы населеных пунктаў вобласці.
«З асаблівай жорсткасцю абстраляны горад Херсон. 82 снарады пацэлілі ў прывакзальную плошчу, тэрыторыю і збудаванні чыгуначнага вакзала, АЗС, дзвюх устаноў гандлю, завода і аўтагаспадаркі; тэрыторыю чыгуначнага пераезду», — адзначаецца ў паведамленні.
Загінулі 23 чалавекі, 46 (з іх двое дзяцей) — атрымалі раненні.
