У Гомелі пачаўся суд над працоўнымі з «Рабочага руху»

У Гомельскім абласным судзе распачынаецца разгляд «справы Рабочага руху», фігурантамі якой праходзяць адразу дзесяць палітзняволеных — Сяргей Шэлест, Уладзімір Жураўка, Андрэй Пагерыла, Ганна Аблаб, Аляксандр Гашнікаў, Сяргей Дзюба, Ігар Мінц, Валянцін Цераневіч, Сяргей Шамецька, Аляксандр Капшуль. Іх усіх абвінавачваюць у здрадзе дзяржаве, а таксама па шэрагу іншых артыкулаў Крымінальнага кодэкса. Ім пагражае да 15 гадоў зняволення, піша «Вясна».

Суд па «справе Рабочага руху» 9 лістапада 2022 года. Скрыншот з відэа ATN

Згодна з матэрыяламі справы, удзельнікі «Рабочага руху» «ажыццяўлялі супрацьпраўную дзейнасць па зборы і наступнай перадачы замежнай дзяржаве і арганізацыі, іх прадстаўнікам (у тым ліку спецслужбам ЗША і Літвы) службовай інфармацыі абмежаванага характару ў дачыненні да беларускіх суб'ектаў гаспадарання пра спосабы абыходу мер абмежавальнага характару (санкцый), а таксама пра механізмы процідзеяння такім спосабам». Паведамляецца, што некаторыя абвінавачаныя планавалі варыянты блакавання вытворчасці на «Гродна Азот» і «БМЗ».

18 кастрычніка 2021 года — амаль праз месяц пасля затрымання фігурантаў справы — «Рабочы Рух» быў прызнаны экстрэмісцкім фарміраваннем.

Крымінальная «справа Рабочага Руху» знаходзілася ў вытворчасці следчага аддзела ўпраўлення КДБ па Гомельскай вобласці.

— Сяргей Шэлест, Уладзімір Жураўка і Андрэй Пагерыла абвінавачваюцца па арт. 188 КК (паклёп), ч. 1 арт. 356 КК (здрада дзяржаве), ч. 3 арт. 361-1 КК (стварэнне экстрэмісцкага фарміравання і ўдзел у ім).

— Ганна Аблаб, Аляксандр Гашнікаў, Сяргей Дзюба, Ігар Мінц, Валянцін Цераневіч і Сяргей Шамецька — па ч. 1 арт. 356 КК (здрада дзяржаве), ч. 3 арт. 361-1 КК (стварэнне экстрэмісцкага фарміравання і ўдзел у ім).

— Аляксандр Капшуль — па ч. 2 арт. 295 КК (Незаконныя дзеянні ў адносінах да агнястрэльнай зброі), ч. 1 арт. 356 КК (здрада дзяржаве), ч. 3 арт. 361-1 КК (стварэнне экстрэмісцкага фарміравання і ўдзел у ім).

Суд пакуль разглядаецца ў адкрытым рэжыме. На працэс прыехала шмат прадстаўнікоў дзяржаўных медыя.