Кіраўнік «Байпол» заявіў пра палітычныя амбіцыі арганізацыі былых сілавікоў
Кіраўнік «Байпол», прадстаўнік Абʼяднанага пераходнага кабінета Беларусі Аляксандр Азараў на канале «Жыццё-маліна» заявіў пра магчымае стварэнне палітычнай партыі «Байпол». Таксама ён распавёў і пра свае ўласныя амбіцыі.
У жніўні лідарка беларускай апазіцыі Святлана Ціханоўская аб'явіла аб стварэнні Абʼяднанага пераходнага кабінета Беларусі. Аляксандр Азараў заняў у ім пасаду прадстаўніка па бяспецы.
Вядучы канала «Жыццё-маліна» Мікіта Мелказёраў спытаў у былога падпалкоўніка міліцыі, для чаго ў кабінеце прадстаўнік «Байпола».
Азараў сказаў, што «Байпол» — напэўна, самая буйная беларуская дэмакратычная арганізацыя за мяжой, а ўнутры краіны наогул няма ніякіх арганізацый [дэмакратычных].
Ён аргументуе гэта тым, што да абвешчанага год таму плана «Перамога», па яго словах, далучылася каля 200000 беларусаў.
«Мы маем такую падтрымку, адпаведна, мы маем права лічыць, што наша арганізацыя — самая буйная, паколькі мы не ведаем іншых, у якіх ёсць нейкія нават прыкладна такія лічбы».
На пытанне пра палітычныя амбіцыі, Азараў рашуча адказаў, што яны ёсць.
— Мы наогул думаем, што паколькі нас падтрымала вялікая частка беларусаў, то, магчыма, у будучыні мы можам зрабіць сваю партыю «Байпол» — чаму б не? Пакуль гэта не абмяркоўваецца, але чаму б не? Думкі такія ёсць.
На пытанне пра тое, ці быў бы Азараву цікавы пост міністра МУС у новай Беларусі, кіраўнік «Байпол» адказаў, што ў яго прынцып па жыцці: калі не я, то хто?
— Я пакуль не бачу, хто яшчэ можа гэтым заняцца. Вось калі мы вернемся ў Беларусь, магчыма, будуць знойдзеныя сярод звольненых супрацоўнікаў [МУС], якія цяпер знаходзяцца ўнутры Беларусі, больш годныя людзі. Але гэта будзе ў будучыні бачна. Таму цяпер пакуль я падняў, як гаворыцца, гэты сцяг, а далей будзе бачна.
— Міністр МУС — ваша столь па амбіцыях, ці ёсць яшчэ нешта? — спытаў Мікіта Мелказёраў.
— Гэта залежыць, напэўна, ад беларусаў, чаго яны хочуць ад мяне. Пакуль такі ўзровень, а там будзе бачна, — адказаў Аляксандр Азараў.
КДБ прызнаў Аб'яднаны пераходны кабінет экстрэмісцкім фармаваннем
У Аб'яднаны пераходны кабінет уключылі Таццяну Зарэцкую — беларуску, якая трапіла ў спіс Forbes
Аб'яднаны пераходны кабінет прыняў першую пастанову
