Кадыраў адмовіўся ад сваіх словаў пра адстаўку
Кіраўнік Чачэнскай рэспублікі заявіў, што не мае права пакінуць сваю пасаду «проста так», не спытаўшы народ і прэзідэнта, і заклікаў пакінуць размовы пра яго бестэрміновы адпачынак.
Фота: AP
Кіраўнік Чачні ў сваім тэлеграм-канале адзначыў, што мае намер пабіць рэкорд па працягласці знаходжання на пасадзе губернатара. Раней, у суботу ён заяўляў, што можа пакінуць сваю пасаду, бо «засядзеўся».
«Насамрэч, проста так сысці я, вядома, не маю права. Народ даверыў мне кіраўніцтва рэгіёнам. І апраўдаць гэты давер — мой святы абавязак. Сысці магу, толькі спытаўшы народ і прэзідэнта Расіі. Таму размовы аб бестэрміновым адпачынку пакінем на будучыню», — сказаў Рамзан Кадыраў.
Ён нагадаў, што ўзначальвае рэгіён ужо 15 гадоў, аднак рэкорд сярод расійскіх губернатараў — 27 гадоў (Яўген Саўчанка прабыў на пасадзе губернатара Белгародскай вобласці з 1993 па 2020 год).
«Паглядзім, можа, я перасягну гэты паказчык», — заявіў Кадыраў.
