Ці паляпшаюць імунітэт ад кавіду кароткія кантакты з хворымі?

Частка вучоных дапускае магчымасць, што, калі чалавек неаднаразова сутыкаецца з малымі колькасцямі віруса — замалымі, каб захварэць, — гэта таксама можа фарміраваць супрацькавідны імунітэт.

Фота depositphotos.com.

Шмат навукоўцаў лічаць, што абарону ад кавіду вы атрымаеце толькі тады, калі самі перахварэеце. У іншым выпадку ў арганізме проста не хопіць віруса, каб абнавіць супрацькавідны імунітэт, піша Wall Street Journal.

Калі чалавек пераносіць кавід бессімптомна або мае ў арганізме занадта мала віруса, каб яго зафіксаваў экспрэс-тэст, такая хвароба таксама можа спрыяць лепшаму супрацькавіднаму імунітэту ў будучыні. Але ж лічыцца, што кавід з выражанымі сімптомамі, калі ў арганізме ідзе актыўнае размнажэнне віруса, прывядзе да лепшай абароны ад кавіду пасля выздараўлення, чым бессімптомная хвароба.

Тым не менш, заражэнне кавідам нясе шмат рызыкаў — хвароба можа працякаць цяжка, ёсць верагоднасць шпіталізацыі ці нават смерці. Таму адзіны бяспечны спосаб выбудаваць супрацькавідны імунітэт — гэта вакцынацыя.

У той жа час частка вучоных таксама дапускае магчымасць, што калі чалавек неаднаразова сутыкаецца з малымі дозамі віруса, гэта можа спрыяць паляпшэнню імунітэту ад хваробы.

Як гэта можа працаваць? Напрыклад, вірус трапляе на тканкі ўнутры насавой паражніны. Антыцелы, што там знаходзяцца, могуць ідэнтыфікаваць вірус да таго, як імунныя клеткі яго знішчаць або ён пачне размнажацца. Такія антыцелы могуць пазней навучыць імунітэт чалавека распазнаваць вірус кавіду.