У Гродне вайсковы МАЗ пратараніў Škoda. Падаецца, што вінаваты МАЗ, але не ўсё так проста

У Гродна адбылося ДТЗ з удзелам вайсковага грузавіка і легкавіка маркі Škoda. Здарэнне патрапіла на відэарэгістратар, запіс дазваляе меркаваць: МАЗ праехаў на чырвонае святло, але ж, хутчэй за ўсё, вінаватым будзе прызнаны кіроўца цывільнага аўтамабіля.

Хаця сігналаў святлафора для кірунку МАЗа не бачна, але ж па ўскосных прыкметах можна зразумець, што для яго сапраўды гарэла чырвонае святло. Калі ўважліва глядзець відэа, то можна заўважыць, што для пешаходаў ужо загарэлася зялёнае.

Аднак у ДТЗ вінаватым можа быць прызнаны кіроўца Škoda, хаця ён і завяршаў манеўр. Стандартна ДАІ у такіх выпадках лічыць, што прычына — у несаступанні сустрэчнаму аўтамабілю.

Нагадаем, што згодна з пунктам 106 Правіл дарожнага руху, кіроўца, які выехаў на перакрыжаванне пры дазвольным сігнале святлафора, павінен выехаць у запланаваным кірунку незалежна ад сігнала, але пры гэтым павінен саступіць дарогу сустрэчнаму транспарту.

А таго, хто знаходзіўся за рулём МАЗа, імаверна, прыцягнуць да адказнасці за праезд на чырвонае.