Украіна правяла антытэрарыстычныя вучэнні на мяжы з Беларуссю
Каардынацыйнай групай Антытэрарыстычнага цэнтра пры ўпраўленні Службы бяспекі Украіны праведзеныя вучэнні па нейтралізацыі варожай дыверсійнай групы паблізу паўночнай мяжы, на Чарнігаўшчыне. Трэніроўкі праводзіліся ва ўмовах, максімальна набліжаных да рэальных.
Падчас вучэнняў. Фота: dpsu.gov.ua
Паводле легенды вучэнняў, на тэрыторыю кантраляванага памежнага раёна Чарнігаўскай вобласці пранікла дыверсійна-разведвальная група. Умоўныя дыверсанты планавалі нанесці дзяржаве значныя эканамічныя страты і дэстабілізаваць грамадска-палітычную абстаноўку ў прыгранічных раёнах Украіны.
Для выкрыцця і нейтралізацыі ўмоўнай дыверсійна-разведвальнай групы ўдзельнікі вучэнняў правялі комплекс аператыўна-вышуковых, контрразведвальных і фільтрацыйных мерапрыемстваў. У заключнай фазе трэніровак спецназаўцы правялі паспяховую аперацыю па нейтралізацыі «дыверсантаў» у раёне памежнага пункта пропуску.
