Прэзідэнт RFE/RL пра абвяшчэнне сацсетак «экстрэмісцкімі матэрыяламі»: Радыё Свабода катэгарычна адхіляе гэты смешны ярлык
Прэзыдэнт Радыё Свабодная Эўропа / Радыё Свабода Джэймі Флай зрабіў заяву ў сувязі з тым, што суд у Менску прызнаў сацсеткі Радыё Свабода «экстрэмісцкімі матэрыяламі».
«Радыё Свабода катэгарычна адхіляе гэты сьмешны ярлык, — сказаў прэзыдэнт RFE/RL. — Мы імкнёмся і надалей даваць аб’ектыўныя навіны і інфармацыю беларускім людзям, якія цяпер як ніколі маюць патрэбу ў незалежных СМІ. Рэжым Лукашэнкі па-ранейшаму дае зразумець, што яго ігнараваньне праўды і намаганьні абмежаваць доступ да незалежнай інфармацыі ня маюць межаў».
Агулам пасьля сфальшаваных выбараў 2020 году і хвалі масавых рэпрэсій у Беларусі ўлады прызналі больш за 300 інфармацыйных рэсурсаў экстрэмісцкімі.
Суд Цэнтральнага раёну Менску па матэрыялах ГУБАЗіК МУС Беларусі прызнаў інфармацыйную прадукцыю тэлеграм-каналу «Радыё Свабода — Беларусь», яе аналягі ў сацыяльных сетках і відэахостынгу YouTube экстрэмісцкімі матэрыяламі. Пра гэта 3 сьнежня паведаміў тэлеграм-канал ГУБАЗіК.
