Prezident RFE/RL pra abviaščeńnie sacsietak «ekstremisckimi materyjałami»: Radyjo Svaboda kateharyčna adchilaje hety śmiešny jarłyk
Prezydent Radyjo Svabodnaja Eŭropa / Radyjo Svaboda Džejmi Fłaj zrabiŭ zajavu ŭ suviazi z tym, što sud u Miensku pryznaŭ sacsietki Radyjo Svaboda «ekstremisckimi materyjałami».
«Radyjo Svaboda kateharyčna adchilaje hety śmiešny jarłyk, — skazaŭ prezydent RFE/RL. — My imkniomsia i nadalej davać abjektyŭnyja naviny i infarmacyju biełaruskim ludziam, jakija ciapier jak nikoli majuć patrebu ŭ niezaležnych ŚMI. Režym Łukašenki pa-raniejšamu daje zrazumieć, što jaho ihnaravańnie praŭdy i namahańni abmiežavać dostup da niezaležnaj infarmacyi nia majuć miežaŭ».
Ahułam paśla sfalšavanych vybaraŭ 2020 hodu i chvali masavych represij u Biełarusi ŭłady pryznali bolš za 300 infarmacyjnych resursaŭ ekstremisckimi.
Sud Centralnaha rajonu Miensku pa materyjałach HUBAZiK MUS Biełarusi pryznaŭ infarmacyjnuju pradukcyju telehram-kanału «Radyjo Svaboda — Biełaruś», jaje analahi ŭ sacyjalnych sietkach i videachostynhu YouTube ekstremisckimi materyjałami. Pra heta 3 śniežnia paviedamiŭ telehram-kanał HUBAZiK.
