У Анжалікі Борыс у СІЗА пагоршыўся стан здароўя, ёй патрабуецца медыцынская дапамога
У старшыні непрызнанага ўладамі Саюза палякаў у Беларусі Анжалікі Борыс у жодзінскім СІЗА пагаршаецца стан здароўя.
Саюз палякаў у Беларусі паведамляе, што цяпер Борыс, выглядае вельмі нездаровай. Яна мае патрэбу ў тэрміновым аглядзе доктара з выкарыстаннем ультрагукавога абсталявання. Таксама ёй трэба правесці шэраг іншых даследаванняў.
«З апісанняў знешняга выгляду Анжалікі Борыс відаць, што яна выглядае вельмі змучанай, у яе зямліста-жоўты колер скуры, што можа ўказваць на захворванні печані. Таксама ў яе інтэнсіўна выпадаюць валасы», — паведамляюць у СПБ
Вядома, што Борыс пакутуе на цяжкае захворванне страўнікава-кішачнага тракту і печані.
Інэса Тодрык-Пісальнік, блізкая знаёмая Анжалікі, успамінае, што яшчэ да арышту ў Борыс былі частыя галаўныя болі і болі ў жываце, а ў стрэсавых сітуацыях у яе выпадалі валасы.
Без медыцынскіх абследаванняў нельга сказаць, ці з’яўляецца яе слабое здароўе вынікам абвастрэння ўжо наяўных захворванняў ці гэта сімптомы новай хваробы.
Анжаліка Борыс была затрыманыя ў Гродне 23 сакавіка. Яна праходзяць па справе аб «распальванні рэлігійнай і нацыянальнай варожасці» (частка 3 артыкула 130 КК).
Па гэтай справе былі арыштаваныя актывісткі Саюза палякаў з Ліды, Ваўкавыска і Брэста Ірэна Бярнацкая, Марыя Цішкоўская і Ганна Панішава. Праз некалькі месяцаў утрымання ў СІЗА іх вызвалілі і прымусілі пакінуць Беларусь. Андрэй Пачобут, арыштаваны 25 сакавіка, працягвае знаходзіцца за кратамі.
