Мінчуку пагражае тры гады «хіміі» за тое, што спыніў тралейбус падчас пратэстаў
Суд Ленінскага раёна Мінска пачаў разгляд крымінальнай справы 19-гадовага Кірыла Чарткова. Яго вінавацяць у арганізацыі або актыўным ўдзеле ў групавых дзеяннях, якія груба парушаюць грамадскі парадак (арт. 342 КК).
Паводле следства, 11 жніўня 2020 года, прыкладна каля апоўначы, Кірыл «узяў удзел у дзеяннях, якія груба парушаюць грамадскі парадак, далучыўся да неўстаноўленых асоб і рухаўся па праспекце Пушкіна, Прытыцкага і Кальварыйскай, што пацягнула парушэнне працы транспарту і прадпрыемстваў. Выкрыкваў лозунгі і гучна пляскаў у далоні, парушаючы спакой грамадзян. Каля дому №37 на вуліцы Кальварыйскай перагарадзіў рух транспарту».
Чарткоў сваю віну прызнаў часткова, але паведаміў, што спыняў тралейбус 77 маршруту. Астатняга транспарту там не было.
У судзе патлумачыў, што 10 жніўня 2020 выйшаў на вуліцу з-за заклікаў у інтэрнэце. З дому пайшоў на Кальварыйскую паглядзець, што адбываецца ў горадзе.
Прызнаўся, што спыніў тралейбус 77, каб саступіць месца хуткай дапамогі. Пастаяў каля хвіліны. Потым, калі кіроўца папрасіў адысці, ён адышоў у бок.
«Мінсктранс» запрасіў кампенсацыі ў 21 тысячу рублёў, паведамляюць праваабаронцы.
