На фоне кавіднага рэкорду ў Беларусі Піневіч паразважаў пра Вітаўта
На Захадзе не моцна зацікаўленыя ва ўзмацненні беларускай дзяржаўнасці, заявіў сёння міністр аховы здароўя Дзмітрый Піневіч на сустрэчы са студэнтамі Беларускага дзяржаўнага медыцынскага ўніверсітэта, паведамляе БелТА.
У сувязі з гэтым ён прывёў прыклад з гісторыі. «У ВКЛ быў шанец стаць каралеўствам. Мы павінны былі атрымаць карону. І калі кіраваў у Польшчы Ягайла, ён зрабіў усё, каб карона, якую везлі з Ватыкана, была спыненая. З гэтай сітуацыі можна зрабіць выснову, што на Захадзе не моцна зацікаўлены ва ўзмацненні нашай дзяржаўнасці не толькі цяпер, але і тады», — сказаў ён.
Міністр таксама распавёў, што з 1921 па 1936 год польскай адміністрацыяй былі высечаныя практычна ўсе лясы ў Беларусі, лясістасць краіны саступала польскай. На сёння колькасць лясных насаджэнняў павялічылася ў тры разы ў параўнанні з перыядам да 1939 года.
Дзмітрый Піневіч падкрэсліў, што ён знаёмы з многімі аўтарытэтнымі польскімі калегамі і не хацеў бы гэтымі прыкладамі правакаваць рознагалоссі паміж роднаснымі беларускім і польскім народамі. «Я проста кажу пра тое, як яно было», — сказаў ён.
Нагадаем, сёння Мінздароўя паведаміла, што за суткі зафіксавана 1979 выпадкаў каранавіруса. Гэта рэкорд за час пандэміі.
Чытайце таксама: «За два тыдні верасня прыняла столькі ж пацыентаў, колькі ў студзені. І гэта яшчэ не пік». Медыкі і пацыенты пра чацвёртую хвалю кавіду
