Фестываль «Магутны Божа» ў Магілёве адмянілі
Сёлета ў Магілёве меўся прайсці традыцыйны міжнародны фестываль духоўнай музыкі «Магутны Божа». Апошнім часам фестываль ладзіўся раз на два гады, папярэдні прайшоў у маі 2019 годзе.
Звычайна мерапрыемства праходзіла вясной ці летам, аднак да 30 жніўня інфармацыі пра фестываль так і не з'явілася.
Аднак на гэты год фестываль не запланаваны, піша katolik.life. Пра прычыну адмены арганізатары нічога не змаглі паведаміць.
«Магутны Божа» праводзіўся з 1993 года, яго мэтамі ставілася адраджэнне духоўнай культуры на хрысціянскім падмурку, аб'яднанне і ўзаемнае духоўнае ўзбагачэнне з дапамогай музыкі. Мерапрыемства аб'ядноўвала больш за 900 салістаў і творчых калектываў з розных краін.
У праграме былі конкурсы вакалістаў і харавых калектываў, духоўныя спектаклі, свята звонавай музыкі, канцэртныя выступленні. Таксама ладзіліся канферэнцыі, на якіх абмяркоўваліся актуальныя пытанні рэлігіі і веравызнання, узаемадзеяння царквы і дзяржавы.
Фестываль названы па вершу «Магутны Божа» Наталлі Арсенневай, які лёг у аснову беларускага духоўнага гімна. Аднак у апошнія месяцы верш выклікаў крытыку ў праўладных колах.
