«Jak pošuh małanki» — premjera filma pra Raścisłava Łapickaha na «Biełsacie»
24 vieraśnia, 21:40.
Film «Jak pošuh małanki» pra moładzievy antysaviecki supraciŭ u paślavajennaj Biełarusi źniaty Valeryjam Mazynskim hladzicie ŭ piatnicu, 24 vieraśnia, a 21:40 na telekanale «Biełsat».
Pamiać pra Raścisłava Łapickaha žyvie ŭ lehiendach i apoviedach miascovych žycharoŭ. Chtości jaho viedaje jak vydatnika-vučnia, chtości – jak patryjota i pałymianaha zmahara za svabodu. Čym ža praviniŭsia pierad savieckaj uładaj i za što byŭ rasstralany dziesiacikłaśnik smarhonskaj škoły Słaŭka Łapicki? Na hetaje dy inšyja pytańni adkaža novy dakumientalny film Valeryja Mazynskaha «Jak pošuh małanki», źniaty dla telekanału «Biełsat».
Raścisłaŭ Łapicki ź junactva vynošvaŭ płany zmahańnia z kamunistyčnym režymam. U 1948 h. jamu spoŭniłasia 20 hadoŭ, i chłopiec pierajšoŭ u dziesiaty kłas. Tady Łapicki i stvaryŭ padpolnuju moładzievuju arhanizacyju ŭ Miadzieli, da jakoj dałučylisia siabry. Bližejšymi jahonymi tavaryšami i paplečnikami stali Fakuś Nieściarovič ź Juškavičaŭ i Juzik Kačarha z Kačaroh.
Hałoŭnuju rolu – Raścisłava Łapickaha – syhraŭ 22-hadovy Uładzimir Šulžycki, kiraŭnik smarhonskaj supołki «Moładzi BNF». Paplečnikaŭ Łapickaha ŭvasobili Dzianis Łazar z Maładziečna, Justyna Saŭka ź Mienska, vajskoŭcaŭ i śpiecsłužboŭcaŭ – Pavieł Haradnicki, Alaksiej Kavalec, Alaksiej Siudak dy inš. Zdymki prachodzili ŭ Maładziečna, Vialejcy, Smarhoni, Vilni, vioskach i miastečkach.
Dakumientalnaja stužka «Jak pošuh małanki» źniataja na asnovie adnajmiennaj knižki Michasia Čarniaŭskaha, jon ža vystupiŭ i aŭtaram scenaryju.
***
Premjera filma adbudziecca ŭ piatnicu, 24 vieraśnia, a 21:40 na telekanale «Biełsat». «Biełsat» dastupny na spadarožnikach «Sirius 4» (pazicyja 5˚ E, palaryzacyja H, častata 12 379,6 MHz) i «Astra 1Kr» (pazicyja 19,2˚ E, palaryzacyja H, častata 10862 MHz).
Hramadskaja premjera z udziełam aŭtaraŭ i ŭdzielnikaŭ filma adbudziecca ŭ Miensku na pačatku kastryčnika.
