Fest Be Free va Ukrainie sioleta zamieniać kancertami ŭ Biełarusi
Sam fiestyval nie zakryvajuć, a pieranosiać na nastupny hod.
Sam fiestyval nie zakryvajuć, a pieranosiać na nastupny hod.
Be Free-2011 projdzie va ŭkrainskim Roŭnie. Užo dasiahnutaja vusnaja damoŭlenaść ź miascovymi ŭładami. Čamu fest nielha pravieści sioleta, kali rovienskija čynoŭniki takuju ideju sustreli pryjazna?
«Bo mała času. My nie zmahli b naležna padrychtavacca. My nie stavim za metu pravieści fiestyval lubym koštam. My chočam, kab jon adbyŭsia na vysokim uzroŭni, a nie narabić šmat šumu ź ničoha. Tradycyjna fest ładziŭsia ŭ žniŭni. Pieranosić jaho na paźniejšy čas, jak pakazaŭ vopyt Łucka, niemetazhodna», — adznačyŭ adzin z arhanizataraŭ Vital Supranovič.
Kab pra fest nie zabylisia,
vyrašana pravieści Be Free-tur.
Heta budzie šerah vosieńskich kancertaŭ pa haradach krainy. «Płanujucca kłubnyja kancerty. Farmat i daty praviadzieńnia jašče nie vyrašany kančatkova. Čakajecca ŭdzieł maładych i viadomych biełaruskich hurtoŭ, mahčyma, ukrainskich».
Nahadajem, što miesiac tamu arhanizatary zajavili ab admienie sioletniaha festu. Pryčyna była ŭ tym, što čarnihaŭskaja meryja nie dała dazvoł na jaho praviadzieńnie. U aficyjnym adkazie havaryłasia, što vybranaje miesca na bierazie Dzisny źjaŭlajecca łandšafta-reakcyjnaj zonaj ahulnaharadskoha značeńnia. Ale tady nie vyklučałasia mahčymaść pravieści fiestyval u inšym ukrainskim horadzie. U vyniku vyrašyli jaho pieranieści na hod.
«Možna śćviardžać, što adnoj z asnoŭnych pryčyn admieny Be Free stała niežadańnie biełaruskich uładaŭ mieć taki fest u siabie pad bokam, — kaža Vital Supranovič. — Nam takaja pazicyja całkam nie zrazumiełaja. Bo fest nie mieŭ nijakich stasunkaŭ z palityčnymi siłami ni va Ukrainie, ni ŭ Biełarusi. My robim toje, što musiła b rabić u tym liku i dziaržava: papularyzavać biełaruskuju kulturu za miažoj».
Rok-fiestyval Be Free uźnik u 2007 hodzie pad nazvaj «Prava być svabodnym». U papiarednija hady jon prachodziŭ na zachadzie Ukrainy — u haradach Łuck i Lvoŭ. Letaś jon adbyŭsia ŭ Čarnihavie, dzie vyrašyli pravodzić jaho i nadalej. Udzieł u im prymali «Lapis Trubiackoj», «Vopli Vidaplasava», «Krama», B:N, ZATOCZKA, Pomidor/OFF, Znich, Vladivostok i inšyja. Sioleta jon pavinien byŭ prajści 21-23 žniŭnia.
