Lipień abudziŭ biełaruski kiniematohraf
U Minsku pačali zdymać jašče adnu mastackuju karcinu.
U Minsku pačali zdymać jašče adnu mastackuju karcinu.
Na terytoryi Śviata-Jelisaviecinskaha manastyra treci tydzień zdymajuć film pad pracoŭnaj nazvaj «Prypavieści». Praca viadziecca na bazie videastudyi imia sv. Iaana Voina pry manastyry. Režysior filma — Vital Lubiecki.
U asnovu 50-chvilinnaj stužki pakładzieny try prypavieści, jakija i dzielać karcinu na častki: «Niamaja malitva», «Jak Chrystos u hości chadziŭ», «Pasłušenstva».
Kožnaja prypavieść zakančvajecca relihijnym pavučeńniem.
Film nahadvaje ab najvyšejšych dabrotach dla chryścijanina — pakory i pasłušenstvie. A taksama źviartaje ŭvahu na toje, što viera vymahaje ščyraści, a nie miechaničnaha pramaŭleńnia malitvaŭ.
Choć heta i debiutnaja stužka Vitala Lubieckaha ŭ ihravym kino, praca jamu padabajecca. Režysiora navat nie pužaje nievialiki biudžet. Jon uskładaje nadziei na pracu pastanovačnaj hrupy i akcioraŭ. Varta adznačyć, što
apieratar filma — Taćciana Łohinava, viadomaja pa pracy nad «Čornym zamkam Alšanskim», «Znakam biady», «Anastasijaj Słuckaj», «Insajtam».
U filmie zdymajucca Alaksandr Tkačonak, Alena Sidarava, Taćciana Marchiel, Aleh Koc, Andrej Voŭčak.
«Choć pa kinošnych mierkach u nas nievialikaja hrupa, ale ŭsio vyhladaje pa-darosłamu», — žartuje režysior.
Pracu nad stužkaj raspačali 14 lipienia. Užo ŭ žniŭni miarkujuć uziacca za jaje mantaž. A na kastryčnik płanujecca premjera.
«Prypavieści» — pieršy mastacki film videastudyi imia sv. Iaana Voina. Da hetaha pry manastyry ciaham piaci hadoŭ zdymali vyklučna dakumientalnaje kino. Apošniaja karcina «Hałoŭnaja rola» (2009) uvajšła ŭ śpis lepšych filmaŭ u Rasii za minuły hod.
Nahadajem, u lipieni Minskaja kinaškoła-studyja raspačała zdymki mastackaha filma «Anioły adlustravańnia» i padletkavaha sieryjała «ŁunAryKum».
