U minskaj pryvatnaj kinaškole zdymajuć poŭnamietražnaje kino
Z adzinaccaci akcioraŭ navučańnie skončyli siamiora. Stolki ž atrymali siertyfikat i pa śpiecyjalnaści «filmmejkiery».
U Minskaj kinaškole-studyi adbyŭsia pieršy vypusk navučencaŭ. Vyniki hoda pracy padvodzić mastacki kiraŭnik kinaškoły Andrej Pałupanaŭ.
— Kali my zajavili ab sabie letaś, kurs byŭ raźličany na vosiem miesiacaŭ. Navučencaŭ było niašmat. Da kanca dajšło jašče mieniej. Z adzinaccaci akcioraŭ navučańnie skončyli siamiora; stolki ž atrymali siertyfikat i pa śpiecyjalnaści «filmmejkiery». Zrazumieła, pieršy hod pracavali — rekłamy mała. Usio stvarałasia ž z nula.
«NN»: Jak adbyvajecca navučańnie?
AP: Sistema navučańnia ŭ nas pabudavana takim čynam, što akramia vučebnaha płana jość jašče i tvorčyja hrupy. Praz try miesiacy, chto žadaŭ jabjadnoŭvaŭsia ŭ asobnyja hrupy i pracavaŭ pa treninhavaj sistemie.
Kinaškoła — heta mahčymaść znajści adnadumcaŭ, ź jakimi možna rabić film.
Ciapier pierachodzim na dziesiacimiesiačnuju i dvuchhadovuju sistemu navučańnia. Tamu dla sioletnich vypusknikoŭ heta byŭ pakul tolki pieršy etap. Jany atrymali viedy. Im prapanoŭvałasia zrabić finalnyja pracy — roliki. Usie atrymali siertyfikat, jaki ni ab čym nie kaža. Jon tolki paćviardžaje, što byŭ prasłuchany adpaviedny kurs. A ŭžo jak viedy zasvoili, inšaje pytańnie.
Druhi kurs budzie čysta praktyčny. Tym ludziam, što ciapier vypuścilisia, my prapanujem zajmacca dalej. A ŭžo čatyry siemiestry (dva hady) daduć bolš hruntoŭnyja viedy. Ciapier my pracujem nad tym, kab atrymać licenziju, što dazvolić vydavać siertyfikat dziaržaŭnaha ŭzoru, a z časam i mižnarodnaha. Bo ŭžo naładžvajucca kantakty z Polščaj, Italijaj, Hiermanijaj, Francyjaj.
«NN»: A chto pryjšoŭ zajmacca ŭ kinaškołu?
AP: Jość dzieci. Ale i darosłych niamała: buchhałtary, mieniedžery, biźniesoŭcy. Im nie chapaje tvorčaści. I jany siabie znachodziać u kino. Kali čałaviek biare kamieru ŭ ruki — heta adno, ale zusim inšaje, kali jon jašče atrymlivaje viedy pra toje, jak pravilna zdymać. A hałoŭnaje, u jaho źjaŭlajecca mahčymaść svaju pracu kudyści prasunuć. Heta moža być, naprykład, fiestyval. A kali, skažam, biźnies pierajšoŭ užo ŭ razrad pasiŭnaha prybytku, čałaviek moža ŭvieś čas addavać pieravodu chobi ŭ razrad prafiesii.
I tady kino moža pieratvarycca ŭ častku surjoznaha biźniesu.
«NN»: Ci možna havaryć pra niejkija surjoznyja vyniki paśla vaśmi miesiacaŭ navučańnia?
AP: My ŭvieś hety čas supracoŭničajem z kastynhavymi ahienctvami. Usio čaściej źviartajucca, kab zaprasić našych navučencaŭ dla zdymkaŭ u rekłamie, filmach. Pakul heta nievialikija roli, epizody, masoŭka. Ale heta pačatak filmahrafii. Čałavieku ŭžo možna da reziumie prykłaści i videa.
U składzie pieršaj tvorčaj hrupy byŭ źniaty kamiercyjny rolik. Isnavała navat damoŭlenaść z adnoj kampanijaj ab jaho pakupcy. Ale nie skłałasia. Ciapier dastatkova ŭ roliku zamianić brend, kab pradać jaho inšaj kampanii. Aktualnaści jon nie stračvaje. Sacyjalnyja roliki rabili, jakija demanstravalisia pierad supracoŭnikami DAI. Heta možna nazvać dasiahnieńniami.
«NN»: U kinaškołu iduć dobraachvotna. Heta vyklikaje zacikaŭlenaść u navučańni ci ŭsie adrazu čakajuć zdymkaŭ u kino?
AP: Vučebny praces arhanizavany takim čynam, što ŭžo ź pieršaha miesiaca navučency pryvykajuć da abjektyva kamiery, fotaaparata — pierastajuć saromiecca siabie ŭ kadry. Dla akciora važna całkam raźniavolvacca. Tolki tady možna pracavać nad vobrazam. A toje, što jany ŭvieś čas čakajuć, kali ich pačnuć zdymać — narmalna.
U nas buduć zdymacca ŭsie.
Tolki ŭ mianie mnostva cikavych idej. A što havaryć pra patencyjał našych filmmejkieraŭ. Nam by sponsarskaj dapamohi tolki.
«NN»: Ale, nakolki viedaju, vy ŭžo pačali pracu nad poŭnamietražnymi filmami, u jakoj vam dapamahajuć vypuskniki.
AP: Tak. Ciapier ja zajmajusia dvuma surjoznymi pracami.
Heta padletkavy sieryjał «ŁunAriKum», u jakim zadziejničany našy vypuskniki. A druhi prajekt — «Anhieły otražienij»
stvarajecca ŭ składzie adnoj z tvorčych hrup kinaškoły.
Akramia maich prac jość i inšyja. Naša vypusknica Ksiuša Šapavałava zdymaje stužku pa adnym z ramanaŭ amierykanskaha piśmieńnika-fantasta Filipa Dzika. Jana zamachnułasia taksama na poŭnamietražnaje kino. A inšyja vypuskniki pracujuć nad karotkamietražnymi karcinami. I ja dumaju, što paśla leta my ŭbačym ich vyniki.
«NN»: Pra što buduć «ŁunAriKum» i «Anhieły otražienij»?
AP: Zdymki «Anhiełov otražienij» pačalisia 17 lipienia. Heta «fantastyčny film ź lohkim nalotam kibierpanka». Čatyry paŭhadzinnyja navieły, abjadnanyja ŭ adzin poŭnamietražny film. Navieły pamiž saboj siužetam nie źviazanyja, ale idejami pierahukajucca. Fantastyka, ale z čałaviečymi pačućciami ŭ asnovie. Jak by nie ruchaŭsia čas, prablema čałaviečych pačućciaŭ isnuje. Z čatyroch navieł pieršuju płanujem źniać i zmanciravać da kanca žniŭnia. Astatnija budzie zdymać da kanca hoda.
Pieršy zdymačny dzień «ŁunAriKuma» prajšoŭ 14 lipienia. Da kanca žniŭnia my pavinny źniać proma-rolik na 2-3 chviliny. Jon budzie składany pa hraficy, tamu nievialiki pa časie. Pakul my dumajem tolki nad pieršym siezonam z 24 sieryj. Sistema takaja. Spačatku zdymajem proma-rolik. Pad jaho šukajem hrošy. Zatym robim piłotnuju sieryju, jana budzie i pačatkam sieryjała. Ciapier hety «piłot» užo prapanujecca na telekanały. Usio budzie adbyvacca kambinavana. Na etapie rolika pavinny źjavicca zacikaŭlenyja ludzi.
