Jałfimaŭ zavajavaŭ piać załatych miedaloŭ na śpieŭnym čempijanacie ŭ ZŠA
Biełaruskaja kamanda zavajavała niekalki ŭznaharod na Suśvietnym čempijanacie vykanalnickich vidaŭ mastactva ŭ Łos-Andželesie (ZŠA). Pra heta BiełaPAN paviedamiła kiraŭnik kamandy Marharyta Korzun.
Tak, pavodle jaje słoŭ, vakalist Piotr Jałfimaŭ atrymaŭ piać załatych i adzin siarebrany miedal u roznych naminacyjach. 15-hadovaja vakalistka Dzijana Hromava z Homiela ŭznaharodžana dvuma załatymi i adnym bronzavym miedalom, ansambl "Paleskaja zoračka" zavajavaŭ try załatyja miedali. "Vystupleńnie našaj kamandy možna nazvać bliskučym", — skazała Korzun.
Razam z tym, pavodle jaje słoŭ, hałoŭnyja ŭznaharody — tytuły "Hrand-čempijon śvietu" — atrymali vakalistki ź Filipin (u starejšaj uzrostavaj katehoryi) i ZŠA (u małodšaj).
Finał Suśvietnaha čempijanatu vykanalnickich vidaŭ mastactva prajšoŭ u Łos-Anždelesie 23 lipienia. Pry hetym u jaho vyjšli try z čatyroch udzielnikaŭ biełaruskaj kamandy. Vystupić u finalnym šou nie ŭdałosia tolki bajanistu Paŭłu Nieŭmiaržyckamu.
Čempijanat prajšoŭ u ZŠA ŭ 14-ty raz. U im udzielničali pradstaŭniki 52 krain. U ramkach čempijanatu spabornictvy prachodziać prykładna ŭ 60 naminacyjach u vaśmi ŭzrostavych katehoryjach.
Jak paviedamiła Korzun, biełaruskaja kamanda vierniecca ŭ Minsk 2 žniŭnia. Da hetaha času jana płanuje pravieści tvorčyja sustrečy ź biełaruskaj, polskaj, ruskaj dyjasparami, a taksama šerah sustreč z ahientami, pradziusierami i pradstaŭnikami šou-industryi z metaj prasoŭvańnia biełaruskich vykanaŭcaŭ.