Uśled za «Biełaj jabłyniaj hromu»
«Pieśnia fiłamataŭ» barda Alaksieja Žbanava na słovy Adama Mickieviča ŭ pierakładzie Kastusia Ćvirki paśpieła zrabicca nieaficyjnym himnam biełaruskaha studenctva. Nasupierak mierkavańniu metra bard-muzyki i aŭtara radyjopieradačy «Bardy svabody» Źmitra Bartosika, jaki ličyć, što ciapier u ajčynnaj bardaŭskaj muzycy ci nie kožny małady bard starajecca samavyjavicca praz svajo ŭłasnaje słova, 30-hadovy Alaksiej Žbanaŭ stavić na kłasikaŭ: Mickieviča, Bahuševiča i Karatkieviča.
Alaksiej Žbanaŭ kaža, što ŭ niekatorych vypadkach «sens nie ŭ tym, kab samavyjavicca, a ŭ tym, kab nadać hołas jarkim asobam ź inšych časoŭ». Ale pazaminułym stahodździem sprava ŭ Žbanava nie abmiažavałasia: u svaim albomie «Pieśni dla mamy» bard daje vyhavarycca takim jarkim hałasam savieckaj pary, jak Uładzimir Karatkievič i Nił Hilevič. Alaksiej Žbanaŭ sabraŭ śpievy, u jakich jon pry dapamozie svaich i čužych słovaŭ składaje admietnuju, ułasnuju historyju vandrovak pa čužynie i ščaślivaha viartańnia dachaty, historyju spaścižeńnia lubovi i studenckaha siabroŭstva. Tak, Lavon Volski z albomam «Biełaj jabłyniaj hromu» na vieršy biełaruskich paetaŭ mieŭ racyju: usio mianiajecca, kali słuchaješ zvykłyja teksty, pa-pieršaje, azdoblenyja muzyčnym supravadžeńniem, a pa-druhoje ź jasnym razumieńniem kantekstu ich stvareńnia.
Prezientacyja kružełki Alaksieja Žbanava «Pieśni dla mamy» adbudziecca 30 krasavika ŭ biblijatecy imia Puškina (Hikały, 4) Pačatak a 19. Udzieł u kancercie voźmuć siabry śpievaka: muzyki Raman Abramčuk, Andruś Takindanh, paety Maryja Martysievič i Andrej Chadanovič.
