Va Ukrainie asudzili biełarusa za maradziorstva ŭ Bučy
Hramadzianin Biełarusi raniej, imavierna, słužyŭ u Homielskim upraŭleńni Ministerstva nadzvyčajnych situacyj.
Źniščanaja rasijskaja broniemašyna ŭ Bučy. Fota: Yaghobzadeh Alfred / ABACA / PAP
Va Ukrainie sud vynies vyrak hramadzianinu Biełarusi za kradziažy tavaraŭ u kramach Bučy ŭ časie rasiejskaj akupacyi. Zhodna z vyrakam, biełarusa pakarali 5 hadami pazbaŭleńnia voli z vyprabavalnym terminam ciaham dvuch hadoŭ, piša «Svaboda».
Jak vynikaje z materyjałaŭ spravy, hramadzianin Biełarusi razam sa svajoj siabroŭkaj, hramadziankaj Ukrainy, vykradali tavary ŭ kramie kaśmietyčnych vyrabaŭ Watson's i handlovym domie «Buča Passaž».
Spravu zaviali 19 krasavika 2022 hoda. U joj niekalki epizodaŭ. Śledčyja śćviardžajuć, što kradziažom tavaraŭ para zajmałasia z 10 sakavika 2022 hodu, u časie rasiejskaj akupacyi horadu, da 25 krasavika 2022 hodu — na toj čas Buča ŭžo była vyzvalenaja ŭkrainskimi vojskami. Pavodle kvalifikacyi złačynstva — kradziež va ŭmovach vajennaha stanovišča, im pahražała źniavoleńnie na termin ad 5 da 8 hadoŭ.
Abaich fihurantaŭ zatrymali, ale nieŭzabavie vyzvalili pad chatni aryšt i jany ŭciakli. Pakul ich šukali, ukrainka pamierła i na jaje spravu zakryli, a biełarusa zatrymali sioleta ŭ sakaviku i asudzili.
Hramadzianin Biełarusi maje vyšejšuju adukacyju, niežanaty, nie maje sudzimaści. Jak vynikaje z vyraku, u jakim pieraličvajucca rečy, viernutyja jamu, biełarus, padobna, mieŭ dačynieńnie da Ministerstva nadzvyčajnych situacyj Biełarusi. U pryvatnaści, jamu viarnuli paśviedčańni «Centra prapahandy MNS» i «Homielskaha MNS».
U sudzie biełarus «całkam pryznaŭ svaju vinu, ščyra raskajaŭsia, zapeŭniŭ, što zrabiŭ dla siabie naležnyja vysnovy, prasiŭ stroha jaho nie karać».
Vyrak, jaki vynieśli 19 krasavika, nabudzie jurydyčnuju moc praz 30 dzion, kali abvinavačańnie jaho nie abskardzić. Uvieś hety čas biełarus budzie znachodzicca pad chatnim aryštam.
Letaś u kastryčniku stała viadoma, što va Ukrainie za maradziorstva va ŭmovach vajennaha stanovišča ŭ vyšuk abviaścili jašče adnaho hramadzianina Biełarusi, uradženca Mahilova, jaki pryjechaŭ va Ukrainu ŭ 2020 hodzie i žyŭ u Bučanskim rajonie razam sa svajoj siamjoj.
Paźniej stała viadoma, što pravaachoŭnyja orhany vyšukvajuć Siarhieja Łukjanava, jaki ŭciok z-pad varty ŭ Polšču i tam vioŭ hurtok dla ŭkrainskich dziaciej. Da ŭciokaŭ va Ukrainu jon pracavaŭ mastakom u Śviata-Jelisaviecinskim manastyry ŭ Miensku. U Kijevie jon arhanizavaŭ vartu stychijna stvoranaha kala biełaruskaj ambasady miemaryjała pamiaci Ramana Bandarenki.
Čytajcie taksama:
Jak biełarusy dapamahali asnaščać rasijskuju vajskovuju mašynu zachodnim abstalavańniem
AAN: Va Ukrainie amal za dva hady vajny ŭžo zahinuli 10 200 mirnych žycharoŭ
