Ź ciahnika krali paliva prosta na chadu
Rabotniki łakamatyŭnaha depo razam z saŭdzielnikami vykrali zvyš 12,5 ton dyzpaliva.
Pa danych śledstva, šeść mašynistaŭ ciepłavoza i pamočniki mašynistaŭ Babrujskaha abarotnaha depo ź piaćciu žycharami haradskoha pasiołka Akciabrski Homielskaj vobłaści krali razam dyzpaliva.
U pačatku pracoŭnaj źmieny łakamatyŭnyja bryhady ciepłavozaŭ atrymlivali nieabchodny abjom dyzielnaha paliva. Na maršrucie jany ekanomili paliva, umiešvalisia ŭ miechanizmy pryboraŭ biaśpieki, upisvali va ŭlikovyja dakumienty niedakładnyja źviestki ab raschodzie paliva.
U pačatku rejsu rabotniki Babrujskaha depo źviazvalisia z saŭdzielnikami z susiedniaj vobłaści. Žychary harpasiołka padjazdžali na aŭtamabili ŭ zahadzia abumoŭleny punkt na biaźludnym učastku puci ŭ lasnym masivie na terytoryi Akciabrskaha rajona. Adzin ź ich padsadžvaŭsia na ciepłavoz, na chadu źlivaŭ paliva ŭ palimiernyja kanistry i skidaŭ ich na ziamlu. Zatym kanistry zahružali ŭ mašynu i advozili ŭ pryvatny haraž u harpasiołku.
«Nalotčyki» płacili łakamatyŭnaj bryhadzie za kožny vykradzieny litr. Pry kožnym razie atrymlivali ad mašynistaŭ kala 20 litraŭ biaspłatna ŭ jakaści «bonusa». U Kastryčnickim vykradzienaje paliva pierapradavali znajomym pa canie, nižejšaj za rynkavuju.
Ź lipienia 2021 hoda pa sakavik 2022 hoda abvinavačanyja, pavodle SK, vykrali bolš za 12,5 ton dyzielnaha paliva na sumu zvyš 29 tysiač rubloŭ.
Adzin ź fihurantaŭ vyzvaleny ad pryciahnieńnia da kryminalnaj adkaznaści ŭ suviazi z amnistyjaj, druhi — pryciahnuty da administracyjnaj adkaznaści, bo jaho vypraŭleńnie mahčyma biez prymianieńnia mier kryminalnaj adkaznaści.
Na padstavie sabranych pa spravie dokazaŭ śledstva kvalifikavała dziejańni vaśmi fihurantaŭ zychodziačy z roli kožnaha pa č.č. 2, 3 art. 211 (prysvajeńnie i rastrata majomaści asobaj, jakoj jana daručana, učynienaja hrupaj asob pa papiaredniaj zmovie, u bujnym pamiery) Kryminalnaha kodeksa.
Na stadyi papiaredniaha rasśledavańnia abvinavačanyja častkova kampiensavali straty — zvyš 19 tysiač rubloŭ. Na majomaść fihurantaŭ nakładzieny aryšt na ahulnuju sumu bolš za 100 tysiač rubloŭ.
Jašče adzin fihurant da ŭzbudžeńnia kryminalnaj spravy zjechaŭ za miažu. Jon abjaŭleny ŭ vyšuk.
Čytajcie taksama:
57-hadovuju biełarusku mocna abduryŭ «žanich ź Siryi»
Čarhovaja schiema: «Biełpošta» papiaredžvaje pra paviedamleńni machlaroŭ u miesiendžarach
