«Tyja, chto kuplaje haz, dapamahajuć Rasii?» Prezident UEFA patłumačyŭ, čamu nie adchiliŭ zbornuju Biełarusi
Biełaruskija kamandy praciahnuć udzielničać u mižnarodnych spabornictvach.
Alaksandr Čefieryn. Fota: AP Photo/Christophe Ena
Prezident UEFA Alaksandr Čefieryn rastłumačyŭ, čamu biełaruskija zbornyja i kłuby, u adroźnieńnie ad rasijskich, nie byli adchilenyja ad vystupleńniaŭ na mižnarodnaj arenie.
Čefierynu nahadali, što ministarka ŭnutranych spraŭ Hiermanii Nensi Fiezier u 2022 hodzie zaklikała adchilić ad mižnarodnaha futboła i Biełaruś. Kiraŭnik UEFA ŭ adkaz zajaviŭ, što nivodzin palityk nie budzie jamu zahadvać, jak rabić, paviedamlaje nfolibre.es.
«Ja suprać bajkotaŭ, nie lublu ni bajkoty, ni zabarony. Ale ŭ vypadku z Rasijaj prosta nie było inšaha vyjścia, i my ŭsie pavinny pasprabavać dapamahčy spynić hetuju vajnu, heta varjactva. Ale što tyčycca Biełarusi, to niekalki palitykaŭ napisali nam, kab usie, chto dapamahaŭ Rasii, byli adchilenyja. Ciapier ja zadaju pytańnie: ci dapamahajuć Rasii tyja, chto kuplaje haz? Ci varta adchilać usie jeŭrapiejskija krainy, navat samyja topavyja, jakija praciahvajuć kuplać haz?» — zadaŭsia pytańniem Čefieryn.
Na dumku kiraŭnika jeŭrapiejskaha futboła, hieastratehičnyja prablemy pavinny vyrašać palityki, a patrabavać ad spartyŭnych arhanizacyj vykonvać pracu palitykaŭ — heta papulizm.
Čefieryn zaŭvažyŭ, što palityki zvyčajna dasyłajuć jamu listy pierad vybarami. Paśla kampanii jany supakojvajucca.
Usie zbornyja i kłuby z Rasii byli adchilenyja ad mižnarodnych spabornictvaŭ praz rasijskuju ahresiju suprać Ukrainy. Biełaruskija kamandy praciahvajuć vystupać, adnak praviadzieńnie mižnarodnych matčaŭ na terytoryi Biełarusi zabaroniena.
Čytajcie taksama:
Prezident UEFA: Biełaruskaja fiederacyja futboła nie źviazanaja z režymam Łukašenki
Z Bałharyjaj pačniem, Bałharyjaj i skončym
Kiraŭniku UEFA dazvolili bałatavacca na čaćviorty termin. Ale jamu nie nadta chočacca
