Pradaŭcy aŭtamabilaŭ prosiać admianić rehulavańnie cenaŭ u ichniaj śfiery
Biełaruskaja aŭtamabilnaja asacyjacyja (BAA) prapanavała vyklučyć lehkavyja aŭtamabili z-pad dziejańnia normaŭ pastanovy Savieta Ministraŭ № 713 «Ab sistemie rehulavańnia cenaŭ», zhodna ź jakimi ceny na lehkaviki rehuluje dziaržava. Adpaviednaje paviedamleńnie raźmiaścili na sajcie BAA.
Fota ilustracyjnaje
Svaju prapanovu arhanizacyja hruntuje na materyjałach praviedzienaha pierad hetym mini-daśledavańnia. Dla jaho BAA zaprasiła ŭ Biełstata infarmacyju pra indeksy spažyvieckich cen (ISC) na lehkavyja aŭtamabili za pieryjad sa studzienia 2023 hoda pa luty 2024-ha.
Pavodle atrymanych źviestak, ISC u śniežni 2023 hoda skłaŭ 105,57% da ŭzroŭniu śniežnia 2022-ha, a ŭ lutym 2024 hoda — 102,88%. Heta značyć, prykmietnaje źnižeńnie cenaŭ. A pryčyna hetaha ŭ tym, što, jak ličyć BAA, na rynku prodažaŭ novych lehkavikoŭ daminuje ajčynnaja kampanija «BiełDžy», a kantrol za cenami hetaha vytvorcy vykonvaje dziaržava «z dapamohaj uładalnickaha nahladu ŭ asobie Minprama». A inšyja aŭtadylery vyznačyli svaju cenavuju palityku z ahladkaj na lidara rynku.
U asacyjacyi adznačyli, što praz pastanovu Saŭmina «Ab sistemie rehulavańnia cenaŭ» biełaruski aŭtabiznes «pazbaviŭsia tradycyjnych u suśvietnaj praktycy instrumientaŭ stymulavańnia prodažaŭ». Heta, jak ličać u BAA, nieefiektyŭnaja sistema aŭtabonusaŭ (stymulacyjnych vypłat), zarehulavany aŭtalizinh, mahčymaści rekłamy i inšaje.
«Uzraśli ahulnyja pracavydatki, sfarmavaŭsia zališni dakumientaabarot, istotna vyrasła vierahodnaść ździajśnieńnia techničnych pamyłak pry afarmleńni dakumientaŭ. Z ulikam vyšejpadadzienaha ŭjaŭlajecca metazhodnym vyklučyć lehkavyja aŭtamabili z-pad dziejańnia normaŭ pastanovy № 713», — zajavili ŭ asacyjacyi.
Čytajcie taksama:
Na stancyjach techahladu pačali afarmlać dazvoły dla aŭto na try hady
U Hrodnie pradajuć hruzavičok z HDR, jaki vyhladaje jak cacka
