Kvitkoŭ na aŭtobusy ź Biełarusi ŭ Litvu nie dakupicca. Kolkaść rejsaŭ skaračajecca, ceny rastuć
Kali na vyjeździe ź Biełarusi ŭ polskim kirunku — vielizarnyja čerhi, to na litoŭskim — deficyt kvitkoŭ.
Ilustracyjny zdymak. Fota: «Naša Niva»
Dabracca z Hrodna ŭ ES — cełaja prablema
Paśla zakryćcia Litvoj jašče dvuch punktaŭ propusku na miažy ź Biełaruśsiu ŭ najbolš składanym stanoviščy apynulisia žychary Hrodna — jany vymušanyja rabić vialiki kruh, kab patrapić u pryhraničnyja Biełastok abo Druskieniki.
Kab dabracca z Hrodna ŭ Biełastok, jaki znachodzicca za 80 kiłamietraŭ ad biełaruskaha abłasnoha centra, apošnimi dniami treba kala 2 sutak, kali jechać aŭtobusam praz Brest.
Našmat chutčej možna dabracca da Vilni. Biełaruska-litoŭskuju miažu ŭ punkcie propusku «Bieniakoni» aŭtobusy pierasiakajuć za 1,5—4 hadziny.
Ale tut isnuje inšaja prablema — dastać kvitki na hetyja aŭtobusy. Najbližejšyja volnyja miescy na vyjezd z Hrodna ŭ Vilniu — na 9 krasavika.
U zvarotnym kirunku (ź Vilni ŭ Hrodna) volnyja miescy možna adšukać tolki na pačatak krasavika. Pa stanie na 16 hadzin aŭtorka zastavałasia pa adnym volnym miescy na 2 i 3 krasavika. Na 4 krasavika ŭsie bilety ŭžo taksama raspradadzienyja.
Na hetym fonie rastuć i ceny. Kali ŭ lutym 2023 hoda dabracca z Hrodna da Biełastoka možna było za 60 rubloŭ, to ciapier — za 120. U Vilniu letaś možna było dajechać za 70 rubloŭ, ciapier — za 130.
Ilustracyjny zdymak. Fota: «Naša Niva»
Čamu nie chapaje kvitkoŭ?
Reč u tym, što razam z zakryćciom punktaŭ propusku «Rajharad — Pryvałka» i «Łavaryški — Katłoŭka» Litva vyrašyła skaracić kolkaść dazvołaŭ na pieravozku pasažyraŭ. Praz heta skaraciłasia kolkaść rejsaŭ pamiž krainami.
Aproč hetaha, była ŭviedziena zabarona na pierasiačeńnia miažy pieššu abo na rovary. Taki mietad pierachodu praź miažu byŭ papularny nie tolki ŭ žycharoŭ pamiežnych nasielenych punktaŭ, ale i ŭ biełarusaŭ, jakija jechali ŭ Jeŭropu na pracu.
Mnohija biełaruskija dalnabojščyki pierasiakali miažu na rovary, bo na inšym baku miažy ich užo čakali firmovyja mikraaŭtobusy, na jakich ich davozili da bazy.
Krychu praściej dabiracca ŭ Vilniu ź Minska. Niekalki volnych miescaŭ jość na 27 sakavika. Košt biletaŭ — 120-125 rubloŭ. Anałahičnaja situacyja i ŭ advarotnym kirunku.
A voś žycharam Baranavičaŭ nie pašancavała, rejs Baranavičy—Vilnia bolš nie chodzić, žycharam rajcentra treba jechać ź pierasadkaj u Minsku. Taksama bolš nielha dabracca pramymi rejsami ŭ Vilniu z Pastaŭ.
Usio heta vyniki taho, što Litva z 1 sakavika zabaraniła rabić nierehularnyja pieravozki biez dazvołu.
A što, kali lacieć samalotam?
Situacyja z čerhami i deficytam biletaŭ daviała situacyju da absurdu. Samy chutki sposab dabracca ź Minska da Varšavy — palacieć tudy na samalocie. I heta navat z ulikam taho, što pamiž haradami daŭno niama pramoha avijazłučeńnia i lacieć daviadziecca praz Turcyju.
Fota: skrynšot z sajta aviasales.ru
Tak, naprykład, možna vylacieć ź Minska ŭ Stambuł a 7-j ranicy i ŭžo a 18-j abo 19-j być u Varšavie. Atrymlivajecca, što navat z ulikam pierasadki ŭ Stambule šlach na samalocie zojmie kala 12 hadzin, što chutka ŭ paraŭnańni z prachodžańniem miažy na aŭtobusie (u apošnija dni tolki na heta časam sychodziła bolš za 40 hadzin).
Praŭda, paloty ź Minska ŭ Varšavu — darahoje zadavalnieńnie. Kvitki ŭ adzin bok abyducca prykładna ŭ 650—700 jeŭra (kala 2300—2500 rubloŭ).
Čytajcie taksama:
Na polskim kirunku čarhovy antyrekord z čerhami z aŭtobusaŭ. Kolki času ciapier zajmaje prajezd praź miažu
Čamu patok luksavych aŭto išoŭ praz Polšču i jak ich buduć uvozić ciapier«Na miažy kałaps». Polšča ŭviała abmiežavańni pa ŭvozie aŭtamabilaŭ praź biełaruski pahranpierachod
