Vynieśli prysud miedykam Homiela, jakija źniščyli amal 100 tysiač vakcyn suprać kavidu i hrypu. A spravazdačylisia, što zrabili pryščepki
Zhodna z materyjałami kryminalnaj spravy, zahadčyca adździaleńnia prafiłaktyki adnoj z paliklinik Homiela i starejšaja miedsiastra taho ž adździaleńnia z krasavika 2021-ha pa maj 2023 hoda davali kaleham niezakonnyja ŭkazańni ab zavyšeńni źviestak ab kolkaści zroblenych vakcynacyj. Nasamreč vakcyny źniščalisia.
Za hety pieryjad źniščana zvyš 92 tysiač doz vakcyn koštam kala 2,7 miljona rubloŭ.
Zahadčycy adździaleńnia prafiłaktyki i starejšaj miedycynskaj siastry było pradjaŭlena abvinavačańnie ŭ pieravyšeńni słužbovych paŭnamoctvaŭ, miedsiastry pryščepačnaha kabinieta — u dapamozie takim dziejańniam.
U sudovym pasiedžańni žančyny pryznali svaju vinu ŭ poŭnym abjomie.
Sud Čyhunačnaha rajona Homiela prysudziŭ 7 sakavika zahadčycy adździaleńnia i starejšaj miedsiastry pa piać hadoŭ abmiežavańnia voli biez nakiravańnia ŭ papraŭčuju ŭstanovu, miedsiastry pryščepačnaha kabinieta — čatyry hady abmiežavańnia voli biez nakiravańnia ŭ papraŭčuju ŭstanovu.
Akramia hetaha, sud pastanaviŭ spahnać u salidarnym paradku z abvinavačanych na karyść Homielskaha haradskoha Savieta deputataŭ pryčynienuju materyjalnuju škodu.
Čytajcie taksama:
U Niamieččynie mužčyna 217 razoŭ pryščapiŭsia ad kavidu roznymi vakcynami
