Bandy Haici napali na palicejskuju akademiju i aeraport, samalot premjer-ministra sieŭ u susiednim Puerta-Ryka
Pravadyr kanhłamieratu dzieviaci band zajaviŭ, što kali premjer nie sydzie, u krainie pačniecca vajna.
Kiraŭnik pratestaŭ Džymi Šaryźje (Barbiekiu). Fota: Odelyn Joseph / AP
Bandy Haici, jakija abviaścili vajnu premjer-ministru Aryelu Anry, u aŭtorak napali na palicejskuju akademiju i hałoŭny aeraport krainy; samalot Anry, jaki viartaŭsia z zamiežnaha turne, sieŭ na susiednim vostravie Puerta-Ryka, piša Bi-bi-si.
Pravadyr kanhłamieratu dzieviaci band, były palicejski Džymi Šeryźje pa mianušcy Barbiekiu, u aŭtorak sabraŭ žurnalistaŭ i zajaviŭ im, što kali premjer nie sydzie, u krainie pačniecca vajna.
«Kali Aryel Anry nie sydzie ŭ adstaŭku, kali mižnarodnaja supolnaść praciahnie padtrymlivać jaho, to my pačniem ruchacca prosta da hramadzianskaj vajny, jakaja pryviadzie da hienacydu», — zajaviŭ Barbiekiu, jaki znachodzicca pad sankcyjami AAN za parušeńni pravoŭ čałavieka.
U pačatku dnia ŭ aŭtorak bandy atakavali ŭ stalicy Haici, Port-a-Prensie, palicejskuju akademiju, dzie vučacca bolš za 800 kadetaŭ. Palicyja abjaviła, što šturm byŭ adbity.
Pa słovach vidavočcaŭ, ź jakimi pahavaryli mižnarodnyja ahienctvy, streły byli čutnyja i kala hałoŭnaha aeraporta krainy, raźmieščanaha ŭ Port-a-Prensie mižnarodnaha aeraporta imia Tusiena Łuvierciura.
Z aeraporta sprabavali vylacieć 250 kubincaŭ, ale nie zmahli. «My ŭžo pavinny byli sadzicca ŭ samalot, ale jany znajšli ŭ samalocie dzirku ad kuli», — rastłumačyŭ ahienctvu AFP pa WhatsApp adzin z pasažyraŭ.
Aeraporty Haici zaraz achoŭvajuć sałdaty.
Premjer-ministr Haici Aryel Anry na minułym tydni palacieŭ spačatku na rehijanalny forum u paŭdniovaamierykanskaj Hajanie, a zatym — u Kieniju, padpisvać pahadnieńnie ab adpraŭcy ŭ Haici mižnarodnaha palicejska-vajennaha kantynhientu.
Padčas adsutnaści premjera Barbiekiu abviaściŭ jamu vajnu. U subotu bandy napali na niekalki palicejskich učastkaŭ, a taksama na dźvie turmy ŭ Port-a-Prensie, ź jakich vypuścili niekalki tysiač źniavolenych.
Paśla hetaha ŭrad abviaściŭ nadzvyčajnaje stanovišča i kamiendanckuju hadzinu.
Na praciahu niekalkich dzion ab miescaznachodžańni Aryela Anry ničoha nie było viadoma, ale ŭ aŭtorak ułady Puerta-Ryka — hety vostraŭ uvachodzić na asablivych pravach u skład ZŠA — paćvierdzili, što samalot Anry pryziamliŭsia ŭ ich.
Pierad hetym, pa danych presy, premjeru admoviła ŭ pasadcy Daminikanskaja Respublika, jakaja miažuje z Haici.
Čytajcie taksama:
Bandy Haici ŭziali šturmam turmu i vyzvalili 4000 źniavolenych. Kraina pahruziłasia ŭ chaos
U Ekvadory zabili viadomaha prakurora, jaki rasśledavaŭ napad na miascovy telekanał
