Sacsietki achapiŭ «test apielsinavaj łupiny», jaki praviaraje adnosiny z partnioram na tryvałaść
Test vyznačaje, ci hatovy ramantyčny partnior zrabić dla vas niejkija pryjemnyja drobiazi — navat kali vy mahli b zrabić ich i sami.
Fota: Pixabay
Parada dla ŭsich zakachanych: kali vaš partnior prosić pačyścić jamu apielsin, prosta zrabicie heta. Bo heta moža być nie prosta prośba, ale i pravierka, jakaja śviedčyć pra toje, što kali vy hatovy zapeckać ruki apielsinavym ci mandarynavym sokam, to, vidavočna, kłapociciesia pra svajho kachanaha ci kachanuju.
U chešteha #orangepeeltheory bolš za 33 miljonaŭ prahladaŭ u tyktoku i jon praciahvaje nabirać abaroty ŭ internecie, u tym liku ŭ instahramie: karystalniki publikujuć videa z pośpiechami i niaŭdačami svaich partnioraŭ. Mnohija videa dajuć mahčymaść ludziam pachvalicca svaimi stasunkami ŭ internecie.
Videa zvyčajna pačynajucca z taho, što dziaŭčyna prosić u svajho chłopca ababrać joj apielsin. U ideale jaho adkaz: «Tak, darahaja». Jon spyniaje ŭsie svaje spravy, navat kali zaniaty pracaj ci śpiašajecca, i nieŭzabavie praciahvaje ababrany cytrusavy. Niečyja chłopcy raskładvajuć dolki ŭ paciešnaj formie, naprykład, u vyhladzie sonca ci śmiešnaj pyski.
Jość taksama test s ptuškami, kali adzin z partnioraŭ zaŭvažaje ptušku ŭ aknie i prapanuje svajmu kachanamu ci kachanaj padyści i pahladzieć. Niazdolnaść heta zrabić aznačaje, što partnior nie maje cikavaści da drobiaziaŭ, jakija važnyja dla inšaha čałavieka.
Jašče jość test z kietčupam: čałaviek naŭmysna pralivaje krychu kietčupu na stojku i prosić partniora prybrać heta. Vyniki nieadnaznačnyja. Niekatoryja partniory stajać i niedavierliva hladziać na kietčup, inšyja prybirajuć jaho papiarovymi ručnikami.
Bolšaść hetych testaŭ nasamreč nie jość dokazam sapraŭdnaj prychilnaści vašaha partniora, ale ŭsio adno jany zajmieli vialikuju papularnaść, bo, u adroźnieńnie ad anłajn-apytańniaŭ i ankiet u časopisach typu Cosmo, razhortvajucca ŭ realnym žyćci.
Choć kancepcyja testaŭ bazujecca na žadańni zrabić niešta dla partniora, jaje možna vykarystoŭvać jak manipulacyju i vyryvać z kantekstu, cytuje WSJ ekśpiertku pa adnosinach Łoreł Chaus. Jana zaścierahaje ad zanadta vialikaha davieru da hetych videavyprabavańniaŭ.
Kožnyja adnosiny ŭnikalnyja, sa svajoj viersijaj ababranaha apielsina.
«Važniej uśviedamlać tyja drobiazi, jakija vy robić adno dla adnaho ŭ vašych kankretnych adnosinach naturalna i niazmušana, a nie tyja pryjemnaści, jakija adbyvajucca ŭ adnosinach inšych ludziej», — kaža ekśpiertka.
Tak, naprykład, nie zaŭsiody partnior moža naležnym čynam prajści test na ptušak — u peŭnaj situacyi jon moža padyści da akna, a ŭ inšaj — nie, bo ŭ jaho mohuć być svaje važnyja dumki. Pośpiech ci niaŭdača nie aznačajuć, što heta dobra ci drenna.
Jakim by ni byŭ vynik testu apielsinavaj łupiny, jon moža stać mahčymaściu pačać razmovu na temu, čaho my chočam adno ad adnaho i što robić nas ščaślivymi, — razmovu ŭ spakojnaj i dobrazyčlivaj maniery. U joj možna prahavaryć, jak naładzić svaje stasunki tak, kab pryjemnyja rečy ŭ ich praciahvali adbyvacca.
Kali dla vas važna, kab vaš partnior demanstravaŭ svoj kłopat pra vas tym, što abiraŭ vam apielsin, kuplaŭ vašu lubimuju ježu ci zabiraŭ z pracy na mašynie, treba pra heta damovicca i ŭklučyć heta ŭ svoj paŭsiadzionny dośvied.
Čytajcie taksama:
Praviła «2-2-2» — prostaja kancepcyja ščaślivych adnosin
Na luby biudžet: 10 niebanalnych padarunkaŭ da Dnia zakachanych
