«Vierasień»: novy litaraturny časopis
U čaćvier 7 studzienia — prezientacyja.
U čaćvier 7 studzienia — prezientacyja.
Kancepcyja novaha časopisa — drukavać pieravažna maładych litarataraŭ.
Hałoŭny redaktar «Vieraśnia» Eduard Akulin kaža, što ŭ kožnym numary buduć litaralna pa dva‑try stałyja tvorcy — kab zachavać pierajemnaść, stvaryć škołu. Užo ŭ pieršym numary pradstaŭlenyja maładyja tvorcy Vital Ryžkoŭ, Nasta Kudasava, Nastaśsia Kucharenka, Vola Čajkoŭskaja, Ihar Kananovič, Lizavieta Daminika Panamarova, Darja Lis, Alena Biełanožka, Miur Farydovič… Pobač — žyvyja kłasiki Ryhor Baradulin, Anatol Viarcinski, Leanid Drańko‑Majsiuk…
«Vierasień» užo pačali paraŭnoŭvać z «Dziejasłovam» — inšym litaraturnym časopisam, jaki ŭžo vychodzić kolki hadoŭ. Adnak spadar Akulin kaža, što nichto nikomu darohu nie piarojdzie:
— «Vierasień» stanie vydatnaj placoŭkaj dla tvorčaj moładzi!
Pakul što «Vierasień» zarehistravany z vychadam dva razy na hod. Adnak spadar Akulin płanuje daviesci jaho da farmatu kvartalnaha časopisa.
Maładych litarataraŭ stolki, što i kvartalnika moža nie chapić!
— Užo ŭ pieršym numary jość staronka «Vierasok» — dla samych junych tvorcaŭ, jašče sa školnaj łavy. A taksama abvieščany konkurs «Maładyja hady, maładyja žadanni» — na lepšy patryjatyčny i liryčny vierš. Padviadzieńnie vynikaŭ adbudziecca, naturalna, u vierasni.
Spadar Akulin kaža, što svaje tvory ŭ «Vierasień» moža dasłać luby małady tvorčy čytač «Źviazdy». Elektronny adras dla tvoraŭ — [email protected]
A čamu ŭsio‑taki «Vierasień»? — spytajeciesia vy.
— Nazvu vybiraŭ nie ja, tak časopis užo byŭ zarehistravany. Ale nazva mnie padabajecca! Niechta kaža, što heta vosieńskaja nazva, i jana nie pasuje da moładzievaha vydańnia… Ale ŭ hetaj naźvie nasamreč jość słova «viera». Hety časopis źjaviŭsia ŭ zasieni viery i nadziei na toje, što naša biełaruskaja litaratura ŭsio‑taki dačakajecca «załacistaha, jasnaha dnia» — taho dnia, pra jaki maryŭ jašče Maksim Bahdanovič, naš samy małady kłasik.
Zasnavalnik časopisa — Tavarystva biełaruskaj movy. Jahony staršynia, Aleh Trusaŭ, kaža, što vychad časopisa byŭ pad surjoznaj pahrozaj.
— Spačatku redaktaram musiła być adna maładaja dziaŭčyna, jana ž paśpiachova zarehistravała časopis. Adnak padrychtavać numar nie zdoleła, skłała ź siabie paŭnamoctvy. My źviarnulisia da Eduarda Akulina — i jon zrabiŭ cud: usiaho za miesiac zrabiŭ taki cudoŭny pieršy numar! Miarkuju, što heta budzie časopis dla moładzi — mahčyma, navat dla haradskoj moładzi. I mahu zaśviedčyć, što ŭžo pieršy numar možna śmieła stavić pa ŭzroŭni pobač z «Połymiem» i «Maładościu»! Uvohule chaču adznačyć, što časopis «Vierasień» staŭ jašče adnym śviedčańniem libieralizacyi dziaržaŭnaj palityki ŭ dačynienni da biełaruskaj movy i kultury. U 2009 hodzie sapraŭdy było zroblena davoli šmat, i «Vierasień» — adzin z prykładaŭ!
Prezientacyja časopisa «Vierasień» z udziełam aŭtaraŭ adbudziecca 7 studzienia a 18‑j hadzinie ŭ Čyrvonym kaściole ŭ Minsku (płošča Niezaležnasci). Uvachod volny. Pieršyja 10 haściej atrymajuć časopis u padarunak, a pieršyja 100 asobnikaŭ buduć pradavacca z kaladnymi dadatkami — dyskami Eduarda Akulina i Taćciany Biełanohaj.
***a, Źviazda
7 studzienia ŭ Čyrvonym kaściole — viečaryna‑prezientacyja pieršaha numara novaha litaraturna‑mastackaha časopisa «Vierasień».
U imprezie biaruć udzieł: Ryhor Baradulin, Anatol Viarcinski, Leanid Dajnieka, Aleh Trusaŭ, Uładzimir Niaklajeŭ, Leanid Drańko‑Majsiuk, Vital Ryžkoŭ, Taćciana Biełanohaja. Viadučy viečaryny — paet i bard Eduard Akulin.
Pačatak a 18‑j. Uvachod volny.
