U studzieni pa kryminalnych palityčnych spravach sudzili minimum 120 čałaviek
Pravaabaroncam stali viadomyja 19 prysudaŭ. Asudzili 93 mužčyn i 27 žančyn. «Viasna» tradycyjna raskazvaje pra asablivaści kryminalnaha pieraśledu ŭ minułym miesiacy.
Minsk i Hrodna — lidary pa palityčnych sudach
U rehijanalnym razrezie prybliznaja kolkaść asudžanych raźmierkavałasia ŭ studzieni nastupnym čynam:
- Minsk — 70;
- Hrodzienskaja vobłaść — 16;
- Homielskaja vobłaść — 14;
- Bresckaja vobłaść — vosiem;
- Minskaja vobłaść — šeść;
- Mahiloŭskaja vobłaść-piać;
- Viciebskaja vobłaść — adzin.
Tajemnyja sudy
Pravaabaroncy «Viasny» na praciahu studzienia fiksavali istotnaje i paŭsiudnaje abmiežavańnie hałosnaści sudovych razhladaŭ pa palityčna matyvavanych kryminalnych spravach u častcy paviedamleńnia hramadskaści času i miescaŭ praviadzieńnia sudovych słuchańniaŭ.
U raździele «Elektronnaje sudavodstva. Raskład sudovych pasiadžeńniaŭ» na aficyjnym sajcie Viarchoŭnaha suda nie była zahadzia raźmieščanaja infarmacyja ab miescy praviadzieńnia ŭ sudzie Zavodskaha rajona Minska razhladu ŭ dačynieńni da Vieraniki Machnač, abvinavačanaj pavodle art. 342 Kryminalnaha kodeksa. Infarmacyja pra miesca była dastupnaja ŭžo paśla razhladu spravy. Takaja ž prablema miełasia i ŭ vypadku sudovaha razboru ŭ dačynieńni da Illi Čudzina, sprava jakoha razhladałasia pa tym ža artykule ŭ sudzie Pieršamajskaha rajona Minska.
Adsutnaść paznaki miesca sudovaha razboru supravadžała sudovyja pasiadžeńni ŭ dačynieńni da Viktara Astapuka, asudžanaha na paŭtara hoda chatniaj chimii i 100 bazavych vieličyń štrafu, i Maksima Hurynoviča ŭ sudach Maskoŭskaha rajona Bresta i Ivacevickaha rajona adpaviedna, pa spravach ab abrazie pradstaŭnika ŭłady. Pieršaje sudovaje pasiadžeńnie ŭ sudzie Zavodskaha rajona Minska pa spravie Maksima Haniesta i Jaŭhiena Parfiončyka pa «narodnym» i narkatyčnym artykule supravadžałasia adsutnaściu paznaki miesca sudovaha razboru.
Adsutničali źviestki ab miescy razhladu spravy ŭ dačynieńni da palitviaźnia Vadzima Husieva, jaki abvinavačvajecca ŭ złosnym niepadparadkavańni patrabavańniam administracyi papraŭčaj ustanovy. U hrafie, pryznačanaj dla ŭkazańnia miesca razboru, stajała tolki abrevijatura — VSP (vyjaznoje sudovaje pasiadžeńnie), heta aznačaje, što suprać jaho ŭžyli represii na terytoryi papraŭčaj ustanovy ŭ parušeńnie standartu hałosnaha i spraviadlivaha sudovaha razboru.
Adsutničała infarmacyja pra čas pačatku pasiadžeńnia 11 studzienia pa spravie Dźmitryja Šaŭčenki, asudžanaha Homielskim abłasnym sudom na paŭtara hoda pazbaŭleńnia voli pa artykułach ab raspalvańni varožaści, stvareńni ekstremisckaha farmavańnia albo ŭdziele ŭ im i abrazie prezidenta. Taksama nie publikavałasia infarmacyja pra čas pačatku sudovych pasiadžeńniaŭ i miesca ich praviadzieńnia ŭ dačynieńni da Valeryja Samsonienki, asudžanaha da hoda pazbaŭleńnia voli sudom Śvietłahorskaha rajona pa artykule ab ździeku ź dziaržaŭnych simvałaŭ.
Na praciahu studzienia zafiksavany šerah vypadkaŭ apublikavańnia źviestak ab pačatku razhladu palityčna matyvavanych spravaŭ užo paśla taho, jak jany pačali słuchacca sudovaj instancyjaj pa fakcie. Heta spravy ŭ dačynieńni:
- Dźmitryja Kuźmy, spravu jakoha razhladaŭ sud Centralnaha rajona Minska pa «narodnym» artykule;
- Aksany i Vitala Karažan, ich spravu razhladaŭ sud Savieckaha rajona Minska pa tym ža, «narodnym» artykule;
- Maksima Haniesta i Jaŭhiena Parfienčyka, jakija abvinavačvalisia pa «narodnym» i narkatyčnym artykułach;
- Alaksandry Sakovič dy Illi Sielaźniova, spravy jakich razhladaŭ sud Maskoŭskaha rajona Minska pavodle «narodnaha» artykuła;
- Alaksieja Škody, Ihara Asiečkina i Taćciany Hidleŭskaj, represavanych sudom Frunzienskaha rajona Mienska pavodle «narodnaha» artykuła;
- Andreja Pratasieviča, abvinavačanaha pa artykule ab abrazie Łukašenki, jaho sprava razhladałasia ŭ sudzie Bychaŭskaha rajona;
- Valeryja Samsonienka, asudžanaha sudom Śvietłahorskaha rajona pa artykule ab ździeku ź dziaržaŭnych simvałaŭ;
- Alaksandra Skarachoda, jaki abvinavačvajecca ŭ zdradzie dziaržavie, spravu praciahnie razhladać Brescki abłasny sud u lutym;
- Alaksandra Sihinieviča, jaki abvinavačvajecca ŭ raspalvańni varožaści, paklopie, pahrozie hvałtu ŭ dačynieńni da słužbovaj asoby, abrazie Łukašenki i pradstaŭnika ŭłady, spravu praciahnie razhladać Hrodzienski abłasny sud u lutym.
Sudy na siemjami
Na praciahu studzienia pravaabaroncy praciahvali fiksavać represii ŭ dačynieńni da cełych siemjaŭ i hrup svajakoŭ. Usio heta supravadžajecca zajavami ŭładaŭ ab paharšeńni demahrafičnaj situacyi ŭ krainie, nieabchodnaści ŭkaranieńnia ŭ škołach pradmietaŭ, «nakiravanych na abaronu i raźvićcio tradycyjnych siamiejnych kaštoŭnaściaŭ».
U studzieni stała viadoma pra pieraśled pa «narodnym» artykule:
- Alaksandra i Dzijany Prakapienkaŭ, a taksama Siarhieja i Darji Kaściukievičaŭ, spravy jakich razhladaŭ sud Frunzienskaha rajona Minska;
- Vitala i Aksany Karažan, Maksima i Alaksieja Kazłoŭskich, ich spravy razhladaŭ sud Savieckaha rajona Minska;
- Alaksieja i Volhi Šaradoŭskich, jakich sudzili ŭ sudzie Zavodskaha rajona Minska.
Vyniki hetych sudovych razhladaŭ vyśviatlajucca.
Sudy za danaty
Na praciahu studzienia zafiksavany adzin vypadak asudžeńnia pa artykule, jaki praduhledžvaje adkaznaść za «finansavańnie ŭdziełu na terytoryi zamiežnaj dziaržavy va ŭzbrojenym farmavańni abo ŭzbrojenym kanflikcie, vajennych dziejańniach, viarboŭku albo padrychtoŭku asob da takoha ŭdziełu» (č. 2 art. 361-3 KK). Halinu Kraśnianskuju Minski haradski sud asudziŭ da piaci hadoŭ pazbaŭleńnia voli za dobraachvotnaje achviaravańnie na adras zhurtavańnia biełarusaŭ pad nazvaj «Połk Kastusia Kalinoŭskaha», jakoje biare ŭdzieł u bajavych dziejańniach na baku Uzbrojenych sił Ukrainy suprać Rasiejskaj Fiederacyi.
Varta adznačyć, što pryciahnieńnie hramadzian pa hetym artykule idzie pa šlachu vyniasieńnia abvinavaŭčych prysudaŭ i pakarańniaŭ usim, niezaležna ad abstavin kryminalnaj spravy i pamieru danata, u vyhladzie piaci hadoŭ pazbaŭleńnia voli. Hetaja praktyka śviedčyć ab parušeńni pryncypu indyvidualizacyi kryminalnaj adkaznaści.
Masavyja palityčnyja spravy
U studzieni ŭ Vaŭkavysku prachodziŭ razhlad hrupavoj spravy za aktyŭny ŭdzieł u hrupavych dziejańniach, jakija hruba parušajuć hramadski paradak (art. 342 KK). Fihurantami hetaj spravy źjaŭlajucca Vadzim Boŭfał, Mikałaj Raspopaŭ, Pavieł Ažechoŭski, Vacłaŭ Aniśka, Valeryj Chłodnicki, Uładzimir Apanovič, Mikałaj Lapieška, Siarhiej Zielankoŭ, Maksim Dziarniejka i Pavieł Pluščeŭski. Vyniki hetaha sudovaha razboru vyśviatlajucca.
Razam z tym, varta vyłučyć peŭnuju rehijanalnuju śpiecyfiku. Ciaham 2022-2023 hadoŭ orhany ŭnutranych spraŭ pravodzili ŭ nievialikich haradach «rejdy, chapuny i začystki», metaj jakich źjaŭlalisia represii ŭ dačynieńni da tych, chto ŭdzielničaŭ u stychijnych mirnych schodach u 2020 hodzie ŭ hetych rehijonach, byŭ aktyŭnym u dvarovych inicyjatyvach i miascovych čatach. Naprykład, takoha kštałtu akcyi zastrašvańnia ŭ Fanipali i Dziaržynsku zakančvalisia sudovymi razhladami, što išli na praciahu ŭsiaho 2023 hoda, u dačynieńni da kožnaha zatrymanaha paasobku. Tamu možna adznačyć, što ŭ Vaŭkavysku praktyka represij pajšła pa tym ža šlachu razhladu vialikaj hrupavoj spravy.
Čytajcie taksama:
Jak minimum 224 čałavieki trapili pad pieraśled padčas masavaha chapunu svajakoŭ palitviaźniaŭ
Čaćviorty raz zapar aryštavali ŭdzielnika naftanaŭskaj stački
