Voś čamu ŭ lubym vypadku nielha strymlivać čchańnie
Strymlivańnie čychu moža razarvać trachieju. Brytanskija lekary paviedamili pra pieršy viadomy vypadak, kali čałaviek paškodziŭ trachieju, trymajučy nos i rot zakrytymi padčas čchańnia.
Vyjava: vecteezy
Voś strašny ŭrok ab tym, čamu treba čchać nie strymlivajučysia, kali vam chočacca čchnuć. U artykule, niadaŭna apublikavanym u BMJ Case Reports, viadziecca havorka pra vypadak z 30-hadovym mužčynam, jaki razarvaŭ svaju trachieju, trymajučy nos i rot zakrytymi padčas čchańnia. Vidać, heta pieršy zadakumientavany vypadak takoj traŭmy pry padobnych abstavinach.
Paviedamlajecca, što mužčyna raniej chvareŭ na palinoz (inšaja nazva siannoj lichamanki, jakaja moža supravadžacca alerhičnym nasmarkam i čchańniem). Adnojčy padčas jazdy mužčyna adčuŭ, što pačynajecca novy epizod čchańnia, i vyrašyŭ zacisnuć nos dy zakryć rot, kab zadušyć jaho.
Adrazu paśla hetaha čałaviek adčuŭ mocny bol u šyi, što prymusiła jaho źviarnucca ŭ miascovaje adździaleńnie chutkaj dapamohi. Apuchłaja i ćviordaja šyja vymusiła daktaroŭ nieadkładna pravieści KT– i MRT-daśledavańnie.
Abśledavańnie pakazała, što ŭ mužčyny spantannaja pierfaracyja trachiei — inšymi słovami, adtulina ŭ trachiei. Hety typ traŭmy zvyčajna byvaje vyklikany fizičnaj traŭmaj abo niaščasnym vypadkam padčas apieracyi abo intubacyi. Daktary pryjšli da vysnovy, što ŭ hetym vypadku pierfaracyja trachiei adbyłasia z-za chutkaha narastańnia cisku ŭ joj padčas čchańnia z zacisnutym nosam i zakrytym rotam.
Bolš surjoznyja vypadki pierfaracyi trachiei mohuć pierakryć pastupleńnie pavietra i zapatrabavać terminovaha chirurhičnaha ŭmiašańnia. Ale pakolki mužčyna, zdavałasia, byŭ u paradku, lekary pryniali na ŭzbrajeńnie bolš kansiervatyŭny padychod. Jamu dali abiazbolvalnyja i leki ad alerhii. Dva dni mužčyna znachodziŭsia pad pilnym nahladam u špitali, pryčym pieršuju noč jon taksama nie moh ni jeści, ni pić. Paśla pacyjentu dali doŭhačasovyja leki ad alerhii i zahadali bolš nie zatrymlivać čchańnie. Praź piać tydniaŭ abśledavańnie pakazała, što razryŭ całkam zahaiŭsia.
Choć, pavodle paviedamleńnia aŭtaraŭ dakładu, heta byŭ pieršy padobny vypadak, raniej byli zadakumientavanyja i inšyja surjoznyja ŭskładnieńni praz strymany čych. Gizmodo raspaviadaje, što ludzi łamali rebry, razryvali barabannyja pieraponki i navat łopali asłablenyja kryvianosnyja sudziny ŭ hałaŭnym mozhu.
Hetyja traŭmy nadzvyčaj redkija, ale, uličvajučy adsutnaść jakoj-niebudź realnaj karyści ad strymlivańnia čchańnia, lekary nastojliva rajać davać sabie volu i nie strymlivacca. Kali vy turbujeciesia ab raspaŭsiudžvańni smarkačoŭ i mikrobaŭ i nie možacie znajści izalavany kutok, kab schavacca — čchańnie ŭ łokać dalej ad čužych tvaraŭ zaŭsiody vydatna pracuje.
Čytajcie taksama:
Alerhičny nasmark: čamu adny mučacca ad jaho, a inšyja nie
Doktar raspavioŭ, pra jakoje zachvorvańnie moža śviedčyć raptoŭnaja alerhija