Prajšoŭ pieratrus u domie Alaksandra Milinkieviča
Dźviery ŭ domie palityka apłambavanyja, piša Biełsat.
Pryčyny pieratrusu albo taho, ci zaviedzienaja na jaho kryminalnaja sprava, Alaksandr Milinkievič nie viedaje.
Sam palityk, jaki byŭ kandydatam u prezidenty na vybarach 2006 hoda, znachodzicca za miažoj.
U kancy listapada masavyja pieratrusy pa ŭsioj krainie prajšli ŭ pradstaŭnikoŭ Kaardynacyjnaj rady i ich svajakoŭ. SK paviedamiŭ, što padazravanymi pa spravie prachodziać bolš za sto čałaviek.
U śniežni, pavodle pravaabaroncaŭ, chvala pieratrusaŭ i pravierak prajšła ŭ byłych naziralnikaŭ na prezidenckich vybarach u 2020 hodzie.
25 lutaha ŭ Biełarusi projdzie tak zvany Adziny dzień hałasavańnia — vybary ŭ saviety deputataŭ roznych uzroŭniaŭ.
Ułady nieadnojčy padkreślivali, što vybary pavinny prajści «zładžana i arhanizavana». Asobaja rola ŭ hetym adviedziena siłavikam.
Masavyja palityčnyja represii ŭ Biełarusi praciahvajucca z 2020 hoda, kali vybary supravadžalisia nierehistracyjaj i aryštami praciŭnikaŭ Łukašenki i naziralnikaŭ na vybarčych učastkach. Niahledziačy na heta, Alaksandr Łukašenka, miarkujučy sa źviestak z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhravaŭ Śviatłanie Cichanoŭskaj, ale nie addaŭ ułady.
Pa słovach hienieralnaha prakurora Andreja Švieda, u krainie zaviedziena bolš za 16 tysiač kryminalnych spraŭ «ekstremisckaj skiravanaści», to-bok palityčnaha charaktaru. Zhodna ź infarmacyjaj pradstaŭnika Abjadnanaha pierachodnaha kabinieta Paŭła Łatuški, z 2020 hoda represii zakranuli 136 tysiač čałaviek.
Čytajcie taksama:
Alaksandra Milinkieviča ŭznaharodzili miedalom FOTAFAKT
Alaksandr Milinkievič staŭ pazaštatnym daradcam Cichanoŭskaj
