Čempijanat śvietu pa futbole ŭ 2034 hodzie prymie Saudaŭskaja Aravija
Pravaabaroncy kažuć, što ŭłady Saudaŭskaj Aravii vykarystoŭvajuć sport, kab adciahnuć uvahu śvietu ad unutranych prablem — takaja taktyka viadomaja jak «sportvošynh» (heta značyć admyvańnie reputacyi z dapamohaj sportu).
Barlaman Today
Saudaŭskaja Aravija zastałasia adzinaj krainaj, jakaja pretenduje na praviadzieńnie čempijanatu śvietu pa futbole 2034 hoda. U aŭtorak Aŭstralija admoviłasia ad namieru stać haspadyniaj turniru, i ciapier zajaŭka Er-Ryjada pavinna być uchvalena, piša Bi-bi-si.
Aŭstralijskaja futbolnaja asacyjacyja vyrašyła, što zamiest mundyjala maje namier zasiarodzicca na svaich płanach pravieści Kubak Azii pa futbole siarod žančyn u 2026 hodzie i kłubny čempijanat śvietu pa futbole ŭ 2029-m.
Čempijanat śvietu pa futbole 2026 hoda adbudziecca ŭ ZŠA, Mieksicy i Kanadzie (u ZŠA čempijanat śvietu prachodziŭ u 1994 hodzie, a Mieksika prymie jaho ŭ treci raz: tam ČS pravodziŭsia ŭ 1970-m i 1986-m hadach).
Maroka, Partuhalija i Ispanija prymuć mundyjal 2030 hoda, niekatoryja matčy pry hetym adbuducca ŭ Arhiencinie, Parahvai i Uruhvai ŭ honar 100-hodździa pieršaha čempijanatu śvietu).
FIFA raniej zajaviła, što čempijanat śvietu pa futbole 2034 hoda moža adbycca albo ŭ Azii, albo ŭ Akijanii. Tamu Aŭstralija razhladałasia jak adziny kankurent Saudaŭskaj Aravii.
Choć zajaŭku Saudaŭskaj Aravii padtrymlivaje Azijackaja kanfiederacyja futboła, rašeńnie pravieści tam čempijanat śvietu pa futbole vykliča mnostva sprečak.
U adras hetaj krainy nieadnarazova hučali abvinavačvańni ŭ parušeńni pravoŭ čałavieka. Tolki ŭ adzin dzień u 2022 hodzie tam byŭ pakarany 81 čałaviek, Er-Ryjad taksama krytykavali za ŭščamleńnie pravoŭ žančyn, kryminalizacyju homaseksualnaści, abmiežavańnie svabody słova i ŭdzieł u vajnie ŭ Jemienie.
U 2018 hodzie reputacyja Saudaŭskaj Aravii była surjozna padarvanaja paśla zabojstva apazicyjnaha žurnalista Džamala Chašohi. Jon uvajšoŭ u saudaŭskaje konsulstva i byŭ zabity śpiecyjalna dasłanaj z Er-Ryjada hrupaj asob, padrychtavanych da ździajśnieńnia hetaha złačynstva.
Pravaabaroncy kažuć, što ŭłady Saudaŭskaj Aravii vykarystoŭvajuć sport, kab adciahnuć uvahu śvietu ad unutranych prablem — padobnaja taktyka viadomaja jak «sportvošynh» (heta značyć admyvańnie reputacyi z dapamohaj sportu).
Na minułym tydni pravaabarončaja arhanizacyja Human Rights Watch zajaviła ŭ suviazi z namieram Er-Ryjada pravieści čempijanat śvietu: «imaviernaść taho, što FIFA moža addać čempijanat śvietu pa futbole 2034 hoda Saudaŭskaj Aravii, niahledziačy na žachlivaje stanovišča z pravami čałavieka ŭ hetaj krainie i admova pravodzić jaki-niebudź manitorynh, demanstruje, što addanaść FIFA pravam čałavieka — heta fikcyja».
U aŭtorak jašče adna pravaabarončaja arhanizacyja, Amnesty International, zaklikała FIFA zapatrabavać ad Saudaŭskaj Arabii ŭziać na siabie «vyraznyja abaviazki, jakija majuć abaviazkovuju siłu». «Abaviazki ŭ halinie pravoŭ čałavieka pavinny być uzhodnienyja z patencyjalnymi haspadarami [turniru] da taho, jak prymajucca jakija-niebudź kančatkovyja pastanovy ab praviadzieńni turniru», — skazana ŭ zajavie Amnesty International.
Čytajcie taksama:
Lijaniel Miesi atrymaŭ vośmy «Załaty miač»
FIFA adchiliła eks-kiraŭnika ispanskaj fiederacyi na try hady za pacałunak
Hulca zbornaj Italii dyskvalifikavali na 10 miesiacaŭ z-za stavak. Jon vinny kredytoram €3 miljony
