Tryumf Vajciuškieviča na «Zornym rynhu»: «Ja naradziŭsia tut»
Lider WZ-Orkiestra pieramoh u interaktyŭnym šou telekanała STV eks-vakalista VIA «Siniaja ptica» Alaksandra Źviaroviča.
Lider WZ-Orkiestra pieramoh u interaktyŭnym šou telekanała STV eks-vakalista VIA «Siniaja ptica» Alaksandra Źviaroviča.
5 śniežnia na kanale STV na «Zornym rynhu» syšlisia Źmicier Vajciuškievič i Alaksandr Źviarovič, eks-vakalist VIA «Siniaja ptica».
Źmicier Vajciuškievič vyjšaŭ suprać hurta svajho supiernika adzin. Na rynhu trymaŭsia niazmušana, niby heta i nie zapis na dziaržaŭnym telekanale, a vystupleńnie dzie-niebudź na haradskoj scenie Lvova ŭ časie čarhovaha festu «Be Free».
Śpiavajučy «Ja naradziŭsia tut», Źmicier zrabiŭ zaŭvažny akcent na słovach pra «biełyja i čyrvonyja kvietki». Kamientatary šou, jakija čas ad času źjaŭlalisia ŭ kadry, pry hetym emacyjna padkreślili: «Naš čałaviek, naš!»Bolšaść pytańniaŭ Vajciuškieviču zadavali pa-biełarusku, na biełaruskaj movie było paznačanaje jahonaje imia pobač z numaram telefonu dla hałasavańnia. Źmicier, naturalna, razmaŭlaŭ na rodnaj movie.
Alaksandra Źviaroviča nie mienš ciopła vitali na scenie. Šmat chto z słuchačoŭ pryhadvaŭ pry hetym pra svaju maładość. Adnak vyniki hałasavańnia zafiksavali ŭpeŭnienuju pieramohu lidera WZ-Orkiestra: 5364 hałasoŭ suprać 3943.
***
12 śniežnia ŭ subotu na «Zornym rynhu» syducca «Krama» i rasijskaja śpiavačka Łalita Milaŭskaja. Prahałasavać možna budzie ŭ dzień efiru pa admysłovych numarach (telefanavańnie biaspłatnaje), a taksama na sajcie STV. Pačatak u 20:10.
